Jeńis Qasymbek: LRT jobasy tolyq iske assa, uzyndyǵy 100 shaqyrymǵa jetedi
ASTANA. KAZINFORM — Astanada LRT júıesi halyqtyń kóńilinen shyǵyp, qaladaǵy jolaýshy tasymalyna aıtarlyqtaı áser etip otyr. Bul týraly elorda ákimi Jeńis Qasymbek aıtty.
Ákimniń aıtýynsha, bastapqy kezeńde jobanyń aıaqtalýyna qatysty kúmán bolǵanymen, qazirgi tańda LRT júıesi turaqty jumys istep tur.
— LRT halyqtyń kóńilinen shyǵyp jatyr. Rasynda, ártúrli sebeppen toqtap qalǵan joba bolatyn. Meniń ózimde de bitire alamyz ba degen kúmán bolǵan. Jeksenbi kúni 100 myńǵa jýyq adam paıdalandy. Al qazirgi tańda LRT-men kún saıyn 60-70 myń adam qatynaıdy. Negizgi júkteme tańerteń 6:00–9:00 aralyǵy, túste 12:00–14:00 jáne keshki ýaqytta baıqalady. Qazir eshqandaı problema joq, jaqsy jumys istep tur. Bolashaqta qoǵamdaǵy negizgi kólik túrleriniń birine aınalýy múmkin, — dedi ákim «Ýáde» baǵdarlamasynda.
Onyń aıtýynsha, LRT iske qosylǵannan keıin qaladaǵy kólik aǵynyna da áseri baıqalǵan.
— Qabanbaı batyr dańǵylynda 3-4 kún ishinde kólik sany 12 paıyzǵa deıin azaıdy, — dedi Jeńis Qasymbek.
Ákim sondaı-aq jobany kezeń-kezeńimen keńeıtý josparlanǵanyn atap ótti.
— Bıyl LRT-nyń ekinshi kezeńin Qosshy qalasyna deıin sozdyq. Eger osy qarqyn saqtalsa, kelesi jyldyń sońyna deıin Qosshyǵa deıin tolyq jetkizemiz. Qosshydan kún saıyn 20-25 myńnan astam kólik qalaǵa kiredi. Sonymen qatar LRT-ny Syǵanaq kóshesimen, Aıtmatov kóshesine deıin jetkizemiz. Aıtmatov kóshesi boıymen eki baǵytta jalǵasady. Sondaı-aq Turan kóshesi arqyly burylyp, eski vokzalǵa deıin barady. Jalpy úsh kezeń tolyq iske assa, LRT uzyndyǵy 100 shaqyrymǵa jetedi, — dedi ol.
Sonymen qatar ákim qoǵamdyq kólik júktemesiniń artqanyn da aıtty.
— Qazir avtobýstarmen kúnine 1,2 mln adam qatynaıdy. Bir jarym jyl buryn bul kórsetkish 800 myń bolatyn, ıaǵnı 400 myńǵa artty. Avtobýstar sanyn kóbeıttik, jańarttyq, Bus Lane júıesin engizdik. Qazirgi jyldamdyq burynǵydan 5-6 km/saǵ joǵary. Keıbir marshrýttarda avtobýspen úıden jumysqa barý mashınadan jyldamyraq, — dedi Jeńis Qasymbek.
Odan bólek, ol keptelisti azaıtýǵa baǵyttalǵan jol kartasy iske asyrylyp jatqanyn atap ótti.
— Ótken jyly memlekettik organdardyń jumys ýaqytyn ózgerttik. Mysaly, ákimshilik jáne kommýnaldyq mekemeler 7:00–7:30-da bastaıdy, mınıstrlikter 8:00–de jumysqa kirisedi. Sonyń nátıjesinde tańǵy 7:00–10:00 aralyǵynda kólikter sany shamamen 10 paıyzǵa azaıdy. Bul bizge aldaǵy bir-eki jylǵa qosymsha múmkindik berip otyr, — dedi ákim.
Aıta keteıik, LRT iske qosylǵannan beri jolaýshylar sany 180 myńǵa jetti.
Degenmen LRT júıesinde jolaýshylar tarapynan qaýipsizdik erejelerin buzý jaǵdaılary tirkeldi.
Sondaı-aq, Alataý, Almaty jáne Qonaev arasynda LRT salynýy múmkin ekeni aıtyldy.
