Jeńis Qasymbek LRT jelisi qashan iske qosylatynyn aıtty

ASTANA. KAZINFORM – Elorda ákimi Jeńis Qasymbek Astanadaǵy jeńil relsti kólik (LRT) júıesi aldaǵy 1-2 aıda iske qosylatynyn atap ótti. 

– LRT 30 qyrkúıekten beri synaq rejıminde jumys istep tur, ıaǵnı shamamen 2,5 aı boldy. Aı sońyna deıin barlyq vagon jetkiziledi dep kútilip otyr. Stantsııalardyń ishki árleý jumystary aıaqtalý satysynda tur. Biz bastapqyda synaq rejımi 3 aıdan 6 aıǵa deıin sozylatynyn aıtqanbyz. Aldaǵy bir-eki aıdyń ishinde bul jumystar tolyq aıaqtalyp, LRT-ny iske qosýdy josparlaýdamyz, - dedi J. Qasymbek Ortalyq kommýnıkatsııalar qyzmetinde ótken brıfıngide. 

Qala ákimi ásirese Sh. Qaldaıaqov, Syǵanaq, Qabanbaı batyr dańǵyldary boıynda Esil jáne Nura aýdandaryndaǵy kólik júktemesi birshama azaıatynyn atap ótti. 

– 9 joǵary jyldamdyqty kólik dáliziniń iske qosylýy qoǵamdyq kóliktiń «qarbalas» ýaqyttardaǵy ortasha qozǵalys jyldamdyǵyn 30%-ǵa arttyryp, avtobýstardyń qozǵalys aralyǵyn 8 mınýtqa deıin qysqartady, - dedi Astana ákimi. 

Aıta keteıik, qarasha aıynda elordadaǵy halyq sany 1,6 mıllıon adamnan asqan. Buǵan deıin Jeńis Qasymbek qalanyń ınfraqurylymy qalaı jetildiriletinin aıtqan edi.