Jeńis Qasymbek Qoshy baǵytyndaǵy LRT qashan iske qosylatynyn aıtty
ASTANA. KAZINFORM – Astana 2027 jyldyń sońyna deıin Tarlan Astana jeńil relsti kólik jelisiniń Qoshy baǵytyndaǵy ekinshi bóliginiń qurylysyn aıaqtalyp, iske qosý josparlap otyr. Osy jumystarǵa baılanysty elordanyń birneshe kóshesinde ýaqytsha kólik qozǵalysyna shekteý qoıylady. Bul týraly qala ákimi Jeńis Qasymbekke áleýmettik jelide jazdy.
Ákim Tarlan Astana jeńil relsti kólik jelisiniń Qosshy qalasyna qaraı baǵyttalǵan ekinshi kezeńiniń qurylysy qarqyndy júrip jatqanyn, ony kelesi jyldyń sońynda aıaqtaý josparlanyp otyrǵanyn aıtty.
– Qazirgi ýaqytta qala turǵyndarynan Tarlan Astana jelisiniń ekinshi kezeńiniń qurylysyna, naqtyraq aıtqanda, Aıtmatov, Syǵanaq kósheleri men Turan dańǵylyndaǵy kólik qozǵalysyna qoıylatyn ýaqytsha shekteýlerge qatysty suraqtar túsip jatyr. Ýaqytsha qolaısyzdyqtarǵa túsinistik tanytyp, jeńil relsti kólik jobasynyń iske asýyna qoldaý bildirýlerińizdi suraımyn. Qurylysy aıaqtalǵan soń Tarlan Astana joldardaǵy kólik júktemesin edáýir azaıtyp, ótkizý qabiletin arttyrýǵa jáne keptelis máselesin sheshýge múmkindik beredi. Óz tarapymyzdan qurylys jumysyn barynsha qysqa merzimde ári sapaly aıaqtaý úshin bar kúshimizdi salamyz. Máselen, búginde Tarlan Astana jeńil relsti kólik jelisiniń Qosshy qalasyna qaraı baǵyttalǵan ekinshi kezeńiniń qurylysy qarqyndy júrip jatyr. Kelesi jyldyń sońyna deıin barlyq jumysty aıaqtap, osy ýchaskede qozǵalysty ashýdy josparlap otyrmyz, - dedi Jeńis Qasymbek.
Sonymen birge Aıtmatov kóshesi men Turan dańǵyly boıyndaǵy jeliniń qurylysyn bastaý josparda bar. Ákimniń aıtýynsha, qurylys kezeńinde – osy jyldyń sońyna deıin jáne kelesi jyly Syǵanaq, Aıtmatov kósheleri men Turan dańǵyly boıynda kólik júrgizýshilerine ýaqytsha qolaısyzdyqtar týyndaıdy.
– Bul rette, kólik qozǵalysyn qamtamasyz etý úshin bar kúshimizdi salamyz, - dedi qala ákimi.
Jeńis Qasymbek Syǵanaq kóshesiniń boıynda ornalasqan №201 stantsııada eki deńgeıli aýysyp miný torabynyń qurylysy bastalǵanyn atap ótti.
– Búgin Tarlan Astana jeńil relsti kólik jelisiniń ekinshi kezeńindegi №201, 202 jáne 204 stantsııalarynyń qurylys barysymen tanystym. Syǵanaq kóshesiniń boıynda ornalasqan №201 stantsııada eki deńgeıli aýysyp miný torabynyń qurylysy bastaldy. Munda №2 jáne №3 jelileri túıisedi. Bul jolaýshylarǵa kóshege shyqpaı-aq, bir baǵyttan ekinshisine jyldam ári yńǵaıly aýysyp minýine múmkindik jasaıdy. Jobany iske asyrý qalanyń kólik qatynasyn edáýir jaqsartyp, turǵyndardyń jyldam qatynaýyna jáne elordada zamanaýı kólik ınfraqurylymyn qalyptastyrýǵa múmkindik beredi, - dedi ákim.
Búginge deıin jolaýshylar Tarlan Astana jelisimen 13,8 mln ret qatynaǵan.
