Jeńis Qasymbek elorda sý tasqynyna qanshalyqty daıyn ekenin aıtty
ASTANA. KAZINFORM — Astana ákimi Jeńis Qasymbek Instagram-daǵy paraqshasynda sý tasqynynyń aldyn alý boıynsha atqarylyp jatqan jumystar týraly jazdy.
Onyń sózinshe, bıyl qysta qar molynan jaýdy. Qys mezgiliniń basynan bastap qalanyń kommýnaldyq qyzmetteri 7,8 mln tekshe metrden astam qar shyǵardy. Qalada sý tasqynynyń aldyn alý boıynsha belsendi jumys júrgizilip jatyr.
— Jalpy alǵanda 65 000 pogondy metr aryq-naýa jelisi tazartyldy, 27 myńnan astam pogondy metr kollektorlar jýyldy, sondaı-aq 1 myń 340 tonnadan astam tunyp qalǵan laı shyǵaryldy. Jedel den qoıý úshin azamattyq qorǵanystyń arnaıy toby quryldy. Gıdrotehnıkalyq qurylystardy qaıta jańǵyrtý men nyǵaıtýǵa erekshe kóńil bólinedi. Atap aıtqanda, arnaıy rettegishte Jibek joly aýyly aýdanyndaǵy Esil ózeniniń 3,8 shaqyrymnan astam eski arnasy tazartyldy, sol sııaqty Nura ózenine sý burý jáne sý burý arnasyn salý jumysy aıaqtalýǵa jaqyn, — dep atap ótti Qasymbek.
Ákim atap ótkendeı, Maıbalyq kólinde uzyndyǵy 5,4 km jalǵastyrýshy arna tazartyldy. Bul sý burý jumysyn jaqsartýǵa jáne sý tasqyny kezinde qaladaǵy júıege túsetin júktemeni azaıtýǵa múmkindik beredi.
— Sý tasqynynyń aldyn alý sharalary aıasynda ózen arnalary men aryqtar tazartylyp, keńeıtilip jatyr. Almaty aýdanyndaǵy ındýstrıaldy parkte erigen qar sýynyń ótkizý qabiletin arttyratyn Aqbulaq arnasy tazartylyp, aınalma kanal ornatylýda. Sonymen qatar, Telman aýdanyndaǵy sý sorǵy stantsııasyn qorǵaý sharalary júrgizilip jatyr, — dep jazdy Jeńis Qasymbek.
Buǵan deıin elordada iri utystar týraly habarlaıtyn alaıaqtyq call-ortalyǵy joıylǵany belgili boldy.