Jeńis Qasymbek: bıyl elordada 3,6 myń jumys ornyn ashatyn jobalar iske asady
ASTANA. KAZINFORM — Astana qalasynyń ákimi Jeńis Qasymbek Instagram paraqshasynda júzege asyrylyp jatqan jobalar týraly jazdy. Bul týraly elorda ákimdiginiń saıty jazdy.
— Qalanyń damýyna jeke ınvestıtsııa tartý jumysy júrip jatyr. Olar — áleýmettik nysandarmen qatar óńdeý ónerkásibi, kólik, logıstıka jáne t. b. Bıyl ınvestıtsııalyq jobalardyń sany 55-ke jetti, jalpy ınvestıtsııa kólemi — 300 mlrd teńge. Bul jobalar 3,6 myńǵa jýyq jumys ornyn ashýǵa múmkindik beredi. Investıtsııalyq shtabtyń kezekti otyrysynda ınvestorlardyń birqatar usynysyn qaradyq. Máselen, olar — akvatermaldy keshen, kóterme-logıstıkalyq ortalyq, JEO-nyń kúlin qaıta óńdeıtin qondyrǵy salý. Atalǵan jobalardyń ınvestıtsııalyq kólemi — 31,5 mlrd teńge. Nátıjesinde 400-den astam jumys orny ashylady. Sol sııaqty kópfýnktsıonaldy dene shynyqtyrý-saýyqtyrý keshenin salý jobasyn qaradyq, modýldik qurylymdar, qan alýǵa arnalǵan vakýýmdyq júıeler (vakýteınerler), mys kabel, shynyplastıkten jasalǵan jeń jáne polımer-kompozıttik jabyndar óndiretin zaýyttar ashý múmkindigin talqyladyq. Óńirlik ınvestıtsııalyq shtabtyń otyrysyn turaqty túrde ótkizip, ınvestorlarǵa jan-jaqty qoldaý kórsetip kelemiz, — dep jazdy Jeńis Qasymbek.
Eske sala keteıik, buǵan deıin Astana qalasynyń ákimi Jeńis Qasymbek pen «Qazaqstan temir joly» UK» AQ Basqarma tóraǵasy Talǵat Aldybergenov jumys kezdesý barysynda elordanyń kólik júıesin damytý boıynsha keshendi strategııa ázirleý boıynsha jıyn ótkizgenin jazdyq. Elordanyń kólik ınfraqurylymyn jaqsartý maqsatynda qalany aınalyp ótetin temirjol salynady.