Jeńis Elemesov Baıbekterdiń esimi atalǵan Qospaev isi týraly: Quqyqtyq baǵa berilýi múmkin

ASTANA. KAZINFORM – Qarjylyq monıtorıng agenttigi tóraǵasynyń orynbasary Jeńis Elemesov Baıbekterdiń esimi atalǵan Qospaev isi týraly pikir bildirdi.

- Baıbekke qatysty eshqandaı qylmystyq is tirkelgen joq. Ákesine qatysty da, ulyna qatysty da. Qospaevqa kelsek, úkim oqyldy. Tárkilengen múlik bar. Bólek shyǵarylǵan qylmystyq is bar. Sol boıynsha keıbir tulǵalarǵa quqyqtyq baǵa berilýi múmkin, - dedi ol.

Aıtýynsha, áńgime Qospaev pen jaqtastaryna túrli jolmen kómektesken laýazymdy tulǵalar týraly bolyp otyr.

- Bul jerde qurylys kezinde qandaı da bir sheshim qabyldaǵan, qylmystyq topqa kómektesken laýazym ıeleri bar. Birde boı tasalaýǵa, birde aktıvterdi jasyrýǵa kómektesken, - dedi Jeńis Elemesov.

Eske salsaq, 30 sáýirde Astananyń qylmystyq ister jónindegi mamandandyrylǵan aýdanaralyq soty Eldos Qospaevtyń aǵasy Aıbek Qospaevqa qatysty sot úkimin shyǵarǵan bolatyn.