Jeńildetilgen salyq rejımindegi bıznestiń tabysy 19%-ǵa ósti

Qarjy mınıstrliginiń málimetinshe, 2026 jyldyń alǵashqy alty aıynda atalǵan rejımdegi kásipkerlerdiń tabysy 9,4 trln teńgege jetken. Byltyrǵy sáıkes kezeńde bul kórsetkish 7,9 trln teńge bolǵan.

Jumyspen qamtý kórsetkishinde de ósim bar. Jaldamaly qyzmetkerler sany 14,2%-ǵa artyp, 445 myńnan 509 myń adamǵa jetti. Eńbekaqy qory 7,2%-ǵa ulǵaıǵan.

Sonymen qatar jaldamaly jumyskeri joq bıznes sýbektileriniń sany 30,5%-ǵa azaıdy. Deklaratsııada tabysyn nólden 5 mln teńgege deıin kórsetken kásipkerlerdiń úlesi úshten birge tómendegen.

— Alǵashqy nátıjeler bıznes pen jumyspen qamtýdyń, deklaratsııalanatyn kiristerdiń ósimin kórsetip otyr. Sonymen birge jaldamaly jumyskerleri joq kásipkerler men eń tómengi kiristi deklaratsııalaıtyn sýbektiler azaıǵan. Alynǵan málimetter arnaıy salyq rejımindegi ózgeristiń alǵashqy oń nátıjeleri týraly aıtýǵa múmkindik beredi, — dep habarlady Qarjy mınıstrligi.

Bul derekter jańartylǵan rejım boıynsha alǵashqy eseptiliktiń qorytyndysynda alynǵan. Kásipkerler bıyl tamyzda 2026 jyldyń birinshi jartyjyldyǵyna arnalǵan deklaratsııany alǵash ret tapsyrdy.

Jeńildetilgen deklaratsııa negizindegi arnaıy salyq rejımin jyldyq tabysy 600 myń AEK-ten aspaıtyn jáne Salyq kodeksinde belgilengen talaptarǵa sáıkes keletin dara kásipkerler men zańdy tulǵalar qoldana alady.

Bul rejım boıynsha jeke nemese korporatıvtik tabys salyǵynyń mólsherlemesi — 4%. Jergilikti ókildi organdar ony zańnamada belgilengen shekte tómendetýge nemese ulǵaıtýǵa quqyly.

Salyq jáne esepti kezeń — jarty jyl. Atalǵan rejımdegi kásipkerler ımporttalatyn taýarlarǵa jáne beırezıdentterge baılanysty jaǵdaılardy qospaǵanda, QQS pen áleýmettik salyq tólemeıdi.

Aıta keteıik, bıyl naýryzda ótpeli kezeń aıaqtalǵan kezde Qazaqstanda 1,2 mln-nan astam kásipker jeńildetilgen deklaratsııa negizindegi arnaıy salyq rejımin tańdaǵan bolatyn.