Jeńildetilgen baspana ýádesi: Astanada 51 adam 413 mln teńgesinen aıyrylǵan
ASTANA. KAZINFORM — Astanada 51 azamatty aldap, olarǵa 413 mln teńgeden astam materıaldyq shyǵyn keltirdi dep aıyptalǵan jeti adamnan turatyn uıymdasqan qylmystyq topqa qatysty tergeý aıaqtaldy. Qylmystyq is sotqa joldandy.
Astana qalasynyń prokýratýrasy málimetinshe, top músheleri tórt jyl boıy azamattarǵa jeńildetilgen turǵyn úı baǵdarlamalary arqyly baspana alyp berýge, sondaı-aq tıimdi sharttarmen nesıe rásimdeýge kómektesemiz dep ýáde bergen.
Kúdiktiler óz áreketterine zańdy sıpat berý úshin keńselerdi jalǵa alyp, kommertsııalyq uıymdar qurǵan. Olar azamattarmen qyzmet kórsetý týraly sharttar jasasyp, kepildik hattar rásimdegen. Sondaı-aq memlekettik jáne kvazımemlekettik mekemelerde yqpaldy tanystary bar ekenine sendirgen.
— Tergeý qorytyndysy boıynsha, aıyptalýshylardyń áreketteri Qylmystyq kodekstiń 190-babynyń 4-bóligi (asa iri mólsherdegi alaıaqtyq jáne qylmystyq top jasaǵan alaıaqtyq) jáne 262-baby (uıymdasqan top qurý, oǵan basshylyq etý jáne onyń qyzmetine qatysý) boıynsha saralanǵan. Qylmystyq is sottyń qaraýyna jiberildi, — delingen habarlamada.
Osydan buryn Abaı oblysynda ınternet arqyly 16 adamdy aldaǵan oraldyq alaıaq sottalǵanyn jazǵanbyz.
