Jeńildetilgen avtonesıege qarjy qaıdan keledi: QDB túsinikteme berdi
ASTANA. KAZINFORM — Keıingi jyldary jeńildetilgen avtonesıeleý baǵdarlamasyna bólingen qarajattyń bir bóligi avtobýs parkin jańartýǵa baǵyttalǵannan keıin, naryq qatysýshylary arasynda avtonesıege berilip jatqan qarjynyń qaıdan kelip jatqany jóninde suraqtar kóbeıgen.
Kazinform agenttiginiń resmı saýalyna jaýap bergen Qazaqstan Damý Banki (QDB) jeńildetilgen avtonesıe baǵdarlamasynyń qazirgi ýaqytta qalaı jumys istep jatqanyn túsindirdi.
QDB derekterine saı, 2015 jyldan beri Qazaqstanda avtonesıeleý baǵdarlamasy arqyly 41 myńnan astam azamat otandyq kólik satyp alǵan. Osy ýaqyt aralyǵynda qazaqstandyqtarǵa jalpy somasy 264 mlrd teńgeden asatyn nesıe berilgen. Qazir baǵdarlamaǵa qosymsha bıýdjet qarajatyn bólý josparlanbaǵanymen, júıe revolverlik qaǵıda boıynsha, ıaǵnı qaryz alýshylardyń negizgi boryshty óteýinen túsken qarajat arqyly jumysyn jalǵastyryp jatyr.
— Jeńildetilgen avtonesıeleý baǵdarlamasy sheńberinde ekinshi deńgeıli bankter 2015 jyldan qazirgi ýaqytqa deıin otandyq óndiristegi avtokólik satyp alýǵa jalpy somasy 264 mlrd teńgeden astam 41 089 qaryz berdi, — dep habarlady Qazaqstannyń Damý Banki.
Bank málimetinshe, búginde baǵdarlama boıynsha bólingen qarajattyń jalpy kólemi 82 mlrd teńgeni quraıdy. Alaıda qazirgi kezeńde baǵdarlamany qarjylandyrý úshin qosymsha qarajat bólý kózdelmegen.
Resmı málimetke sáıkes, jeńildetilgen avtonesıe rásimdeý boıynsha kósh bastap turǵan óńirlerdiń qatarynda Almaty men Astana bar. Baǵdarlama iske qosylǵaly Almaty turǵyndary 9 328 nesıe rásimdese, Astanada bul kórsetkish 8 787 bolǵan. Al Qostanaı oblysynda 3 423, Qaraǵandy oblysynda 2 566 jáne Pavlodar oblysynda 2 350 nesıe berilgen.
Sarapshylar baǵdarlamanyń negizgi maqsaty otandyq avtokólik óndirisin qoldaý ekenin aıtady. Osyǵan baılanysty jeńildetilgen nesıe aıasynda eń joǵary suranys Hyundai, KIA jáne Chevrolet markalaryna tıesili.
Qazirgi ýaqytta baǵdarlamaǵa qatysýshy bankter qatarynda Halyq banki, Bank TsentrKredıt, Eýrazııalyq bank jáne ForteBank bar.
Eske sala keteıik, osy jyldyń birinshi toqsanynda Qazaqstanda avtonesıege suranys tómendegenin jazǵan edik.
