Jeńil ónerkásipti damytýǵa arnalǵan 28 shara iske asyrylady
ASTANA. KAZINFORM — QR Premer-mınıstriniń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken keńeste jaýapty mınıstrlikter, «Atameken» UKP, «Damý» qory jáne otandyq kásiporyndar ókilderimen birge Jeńil ónerkásipti damytýdyń 2030 jylǵa deıingi keshendi jospary men salanyń ózekti máseleleri talqylandy. Bul týraly Úkimet málim etti.
Qatysýshylarǵa Jeńil ónerkásipti damytýdyń 2026-2030 jyldarǵa arnalǵan keshendi josparynyń negizgi erejeleri tanystyryldy. Ónerkásip vıtse-mınıstri Oljas Saparbekov atap ótkendeı, qujat zańnama, satyp alý tetigin jetildirý, «kóleńkeli» ımportqa qarsy is-qımyl, ınvestıtsııa tartý, otandyq brendti damytý men kadr daıarlaýǵa arnalǵan 28 is-sharany qamtıdy.
Ortamerzimdi sharalar óndirýshilerdi shıkizatpen qamtamasyz etý, ótkizý naryǵyn keńeıtý jáne memlekettik satyp alý kezinde teń básekelestik jaǵdaı jasaýdy kózdeıdi. Uzaqmerzimdi perspektıvada óndiristi jergiliktendirý men naryqtyń ashyqtyǵyn arttyrýǵa basa nazar aýdarylady. Atap aıtqanda, «vırtýaldy qoımalar» mehanızmin jáne elektrondyq shot-faktýrany paıdalana otyryp, shıkizat pen ónimdi tolyq qadaǵalaý júıesin engizý pysyqtalyp jatyr.
— Negizgi quraldyń biri — óndiris kólemin arttyrý, jergiliktendirý, jumys ornyn ashý jáne qyzmetkerlerdiń biliktiligin arttyrý boıynsha bıznestiń qarsy mindettemelerin kózdeıtin sala kásiporyndarymen jergiliktendirýdi arttyrý kelisimin engizý. Onyń esesine kásiporyndar jeńildetilgen qarjylandyrý, jabdyq lızıngi, arnaıy ınvestıtsııalyq kelisimshart pen uzaqmerzimdi satyp alý shartyn qosqanda, keshendi memlekettik qoldaý sharalaryna sene alady, — delingen habarlamada.
Saýda jáne ıntegratsııa mınıstrliginiń málimeti boıynsha, elimizdegi otandyq óndirýshilerdiń basym bóligi jeńil ónerkásip jáne aýyl sharýashylyǵynda shoǵyrlanǵan. Búgingi tańda otandyq ónimge suranystyń negizgi draıveri memlekettik jáne kvazımemlekettik sektor bolyp qala beredi. Sonymen qatar salada syrtqy saýdadaǵy ımport áli de edáýir basym. Bul otandyq óndiristi odan ári damytýdyń aıtarlyqtaı áleýetin kórsetedi.
— Búginde qazaqstandyq óndirýshilerdi qoldaý sharalary da usynylyp otyr. Otandyq taýarlar úshin sóre keńistiginiń keminde 30%-y, memlekettik qoldaý bar saýda nysandary úshin keminde 50% bólý týraly norma zańnamalyq túrde bekitilgen. Saýda jelileriniń jetkizý shartyn jasaýdan negizsiz bas tartýy men jaldaý aqysyn asyrý jaǵdaıy shekteldi. Sonymen qatar Premer-mınıstrdiń tapsyrmasymen, Saýda jáne ıntegratsııa mınıstrligi «Qazaqstanda jasalǵan» brendi boıynsha ónimdi qoldaý men jyljytýdyń keshendi baǵdarlamasyn ázirlep jatyr, — dep habarlady Úkimetten.
Jıyn barysynda «Atameken» UKP «Damý» kásipkerlikti damytý qorymen birge qatysýshylarǵa jeńil ónerkásipti damytýǵa basa nazar aýdara otyryp, Ulttyq Ónim otandyq óndirýshileriniń X kórmesin ótkizý jóninde usynys jasady. Іskerlik baǵdarlamany salalyq plenarlyq sessııa, marketpleıster men bólshek saýda arqyly satýdy damytý boıynsha dóńgelek ústelder, tájirıbelik master-klastar, eksport jáne logıstıka boıynsha konsýltatsııalar, sondaı-aq Fashion Day jáne «Qazaqstannyń jeńil ónerkásibiniń úzdik brendi» konkýrsyn ótkizý esebinen keńeıtý usynylady. Kórme otandyq óndirýshilerdi ilgeriletý, bıznes, saýda jelileri men marketpleıster arasyndaǵy kooperatsııany damytý alańyna aınalyp, qazaqstandyq ónimdi tanymal etýge yqpal etpek.
«QazTextileIndustry» ÓRU basqarma tóraǵasy Gúlmıra Ýahıtova memlekettik satyp alýǵa qatysý úshin ónimdi sertıfıkattaýdyń quny joǵary ekenin másele retinde kóterdi. Sondaı-aq lokalızatsııalaý deńgeıi joǵary, negizinen arnaıy formany jappaı óndirýge mamandanǵan kásiporyndar men óz brendterin damytyp jatqan óndirýshilerge arnalǵan memlekettik qoldaý sharalaryn saralap qoldanýdy usyndy.
Serik Jumanǵarın sertıfıkattaý ónimniń sapasy men qaýipsizdigin qamtamasyz etýdiń qajetti quraly bolyp qala beretinin atap ótti. Sondaı-aq Saýda jáne ıntegratsııa mınıstrligine sertıfıkattaý qunyn tómendetý, arnaıy ınvestıtsııalyq kelisimshart boıynsha jumys isteıtin kásiporyndardyń sertıfıkattar men jekelegen jeńildikterdi qoldaný merzimin ulǵaıtý múmkindigin pysyqtaýdy tapsyrdy.
Jeńil ónerkásip kásiporyndary qaýymdastyǵynyń prezıdenti Saltanat Ábdikárimova memlekettik satyp alýǵa qoıylatyn talapty jetildirý men otandyq óndirýshiler úshin úlgilik tehnıkalyq erekshelik ázirleý qajettigine nazar aýdardy.
«Po Global spetsodejda» fabrıkasynyń dırektory Nadejda Shabaeva memlekettik satyp alý kezinde kásiporynnyń jumys ornyn ashǵa qosqan úlesin, óndiristi jergiliktendirý deńgeıin jáne jańǵyrtýǵa salǵan ınvestıtsııany eskerýdi, sondaı-aq adal otandyq óndirýshilermen uzaqmerzimdi kelisimshart jasaý tájirıbesin arttyrýdy usyndy.
Qatysýshylar mektep formasyn shyǵarý máselesin de talqylady. Kezdesý sońynda salalyq memlekettik organdarǵa ónim sapasyna qoıylatyn talap pen memlekettik qoldaý tetigin jetildirýdi qosqanda, bıznestiń usynystaryn pysyqtaý tapsyryldy.
Serik Jumanǵarın atap ótkendeı, Ulttyq ekonomıka mınıstrligi úshin jeńil ónerkásipti damytý eń aldymen jumys ornyn ashý men otandyq óndiristi damytý turǵysynan erekshe mańyzǵa ıe.
— Keshendi jospar órshil mindet qoıyp otyr. 2030 jylǵa qaraı shıkizatty qaıta óńdeý kólemin 1,5-2 ese arttyrý, 40 myńǵa jýyq jumys ornyn ashý jáne 35 ınvestıtsııalyq jobany júzege asyrý mindeti tur. Memleket jergiliktendirýdi arttyratyn jáne óndiristi damytatyn kásiporyndardy qoldaýǵa daıyn. Bul rette Keshendi jospar ıkemdi qujat bolyp qala beredi, Qajet bolǵan jaǵdaıda, ony júzege asyrý tájirıbesi eskerile otyryp, pysyqtalady, — dep atap ótti Serik Jumanǵarın.
Aıta keteıik, buǵan deıin Serik Jumanǵarınniń tóraǵalyǵymen ekonomıkalyq ósýdi qamtamasyz etý jónindegi shtabtyń kezekti otyrysy ótken bolatyn.
