Jeńil ónerkásipke 40 mlrd teńge ınvestıtsııa salyndy
ASTANA. KAZINFORM – 2025 jyldyń qorytyndysy boıynsha Qazaqstanda jeńil ónerkásip óndirisiniń kólemi shamamen 260 mlrd teńgeni qurady. Bul týraly QR Ónerkásip jáne qurylys mınıstrligi Ónerkásip komıteti tóraǵasynyń orynbasary Muhamed Andakov Ortalyq kommýnıkatsııalar qyzmetinde ótken baspasóz máslıhatynda málimdedi.
Onyń málimetinshe, óndiris qurylymynda toqyma salasy basym — 159 mlrd teńge. Kıim tigý kólemi shamamen 84 mlrd teńgeni, al bylǵary jáne oǵan qatysty ónimder óndirisi 17 mlrd teńgege jýyq.
Sondaı-aq salanyń negizgi kapıtalyna salynǵan ınvestıtsııalar kólemi 40 mlrd teńgeni qurady.
– Jalpy ishki ónimdegi jeńil ónerkásiptiń úlesi 0,1 paıyzdy quraıdy. Ónerkásip óndirisindegi úlesi — 0,4 paıyz, al óńdeý ónerkásibindegi úlesi 0,8 paıyz boldy. 2025 jyly elimizdegi jeńil ónerkásip naryǵynyń kólemi 3,6 mlrd AQSh dollaryna jetti. Onyń ishinde otandyq óndirýshilerdiń úlesi 8,1 paıyz, qalǵany ımportqa tıesili, - dedi Muhamed Andakov.
Onyń sózinshe, 2024 jyly bul kórsetkish 5,1 paıyz bolǵan. ıAǵnı, otandyq ónim úlesi birtindep artyp keledi.
– Jalpy, jeńil ónerkásip úsh negizgi baǵyttan turady. Onyń ishinde toqyma óndirisiniń úlesi 61 paıyzdy, kıim tigý salasy — 32 paıyzdy, al bylǵary jáne oǵan qatysty ónimder óndirisi 7 paıyzdy quraıdy, - dedi ol.
Aıta keteıik, buǵan deıin Qazaqstanda jeńil ónerkásip taýarlarynyń bir bóligi ulttyq rejımnen shyǵarylǵany týraly habarlanǵan edi.
