Jeńil ónerkásip taýarlarynyń ulttyq rejımnen shyǵarylatyn tizimi bekitildi

ASTANA.KAZINFORM - Qazaqstanda ulttyq rejımnen shyǵarylatyn jeńil ónerkásipke qatysty taýarlar, jumystar men qyzmetterdiń tizimi bekitildi. Tıisti buıryqqa QR Ónerkásip jáne qurylys mınıstri qol qoıdy.

Jańa tizimge 1984 taýar ataýy engizildi. Olardyń qatarynda jip, mata, súlgi, tósek jabdyqtary, kórpe, perde, shatyr, qap, kilemshe, kıiz jáne basqa da buıymdar bar.

Buıryq qol qoıylǵan kúninen bastap kúshine enedi. 

Buǵan deıin Úkimette jeńil ónerkásipti damytý máselesi qaralǵan bolatyn.  Mınıstrliktiń málimetinshe, sońǵy bes jylda sala turaqty ósim kórsetip keledi.

Atap aıtqanda, 2025 jyldyń qorytyndysy boıynsha óndiris kólemi 13,2%-ǵa ósip, 260 mlrd teńgege jetti. Óńdeý ónerkásibindegi jeńil ónerkásiptiń úlesi 0,8%-dy quraıdy.

Sala qurylymynda toqyma óndirisi basym – onyń úlesi 60%-dan asady. Kıim óndirisi 32%-dy, al aıaq kıim men bylǵary buıymdary 6,5%-dy quraıdy. Kásiporyndardyń 97%-dan astamy shaǵyn bızneske tıesili.

Buǵan deıin bıyl elde iske qosylatyn jańa kásiporyndar týraly jazǵan edik.