Jeńil ónerkásip salasynda jumysshylardyń 60 paıyzy - áıel

ASTANA. KAZINFORM – Búginde otandyq jeńil ónerkásip salasynda shamamen 28 myń adam eńbek etedi, olardyń shamamen 60%-y áıel mamandar. Bul týraly Ónerkásip jáne qurylys mınıstrligi Ónerkásip komıteti tóraǵasynyń orynbasary Muhamed Andakov málim etti.

- Sońǵy jyldary sala eleýli jetistikterge jetti. Bıyl jeńil ónerkásipti damytý jónindegi jol kartasyn júzege asyrý aıaqtalady. Onyń aıasynda salalyq kásiporyndardy qoldaý, óndiristik bazany damytý jáne ishki suranysty yntalandyrý boıynsha negizgi sharalar iske asyryldy, - dedi Muhamed Andakov elordada ótken jeńil ónerkásip ulttyq birlestiginiń 10 jyldyǵyna arnalǵan ІІ sezinde.

Onyń aıtýynsha, jeńil ónerkásipti damytýdyń negizgi faktory – memlekettik qoldaý.

- Sońǵy jyldary jabdyqty jańartýǵa qarajat bólinip, ákimshilik rásimder jeńildetildi jáne salyq jeńildigi engizildi. Naryqta teńdeı jaǵdaıdy qamtamasyz etý jáne óndiristik qýatty júkteýdi yntalandyrý maqsatynda jeńil ónerkásiptiń 1162 taýar túrin ulttyq rejımnen alyp tastaý belgilendi. Toǵyz arnaıy ekonomıkalyq aımaqta jeńil ónerkásip salasy basym salalar tizimine engizilip, kásiporyndarǵa qoljetimdi óndiristik alańdar men ınfraqurylymǵa qol jetkizildi, - deıdi ol.

Buǵan deıin habarlaǵanymyzdaı elimizde jeńil ónerkásipti damytýdyń keshendi jospary ázirlenip jatyr. 

Búgin elordada Qazaqstannyń jeńil ónerkásip ulttyq birlestiginiń 10 jyldyǵyna oraı sezd ótti.