«Jeńil munaı» qory azaıyp keledi: Qazaqstan tereń qabattardy barlaýǵa kiristi
ASTANA. KAZINFORM – Qazaqstanda «jeńil munaı» qory men jaqsy zerttelgen nysandardaǵy qor kólemi azaıyp keledi. Osyǵan baılanysty jańa munaı-gaz qorlaryn izdeý tereń jatqan, tuzasty jáne az zerttelgen aýmaqtarǵa baǵyttalyp jatyr. Bul týraly QR Energetıka mınıstrligi Kazinform agenttiginiń resmı saýalyna bergen jaýabynda málimdedi.
Vedomstvonyń habarlaýynsha, munaı-gaz salasyndaǵy negizgi mindetterdiń biri – uzaq ýaqyttan beri ıgerilip kele jatqan ken oryndarynyń ornyn jańa qorlarmen ýaqtyly tolyqtyrý.
– «Jeńil munaıǵa» jáne jaqsy zerttelgen nysandardaǵy qor azaıyp barady. Osyǵan baılanysty geologııalyq barlaý kóbinese tereń jatqan, paleozoı, tuzasty, kúrdeli qurylymdy nysandar men az zerttelgen aýmaqtarǵa qaraı baǵyttalyp otyr. Osy maqsatta 2026–2030 jyldarǵa arnalǵan aýqymdy geologııalyq barlaý baǵdarlamasy ázirlengen. Onyń aıasynda geologııalyq zertteýdiń ártúrli kezeńindegi 23 jobadan turatyn portfel jasaqtaldy, - delingen jaýapta.
Jańa qorlardy izdeýdegi negizgi áleýet Kaspıı mańy basseıniniń tuzasty qabattarymen, tereń jatqan jáne paleozoı keshenderimen, sondaı-aq buǵan deıin az zerttelgen aýmaqtarmen baılanysty.
Alaıda mınıstrlik málimetinshe, mundaı jerlerde munaı men gaz izdeý burynnan zerttelgen ken oryndaryna qaraǵanda kúrdelirek. Sebebi qordyń naqty kólemin anyqtaý qıyn, barlaý jumystary kúrdeli tehnologııalardy jáne kóp qarjyny qajet etedi.
– Sondyqtan aldaǵy ýaqytta jańa munaı-gaz qorlaryn izdeıtin aýmaqtardy kóbeıtip, olardy burǵylaý jumystaryna daıyndaý josparlanyp otyr. Sonymen qatar geologııalyq zertteýlerdiń sapasyn arttyryp, kóp qarjy qajet etetin jobalarǵa sheteldik jáne otandyq seriktester tartý kózdelip otyr, - delingen mınıstrliktiń Kazinform agenttigine bergen jaýabynda.
