Jeńil atletıkadan ulttyq qurama sapyna jańa sheteldik sportshylar qosylýy múmkin be

ALMATY. KAZINFORM — Almaty mańynda ótetin Ǵusman Qosanov atyndaǵy halyqaralyq jarys aldynda QR Jeńil atletıka federatsııasy baspasóz máslıhatyn ótkizdi.

BAQ ókilderi QR Jeńil atletıka federatsııasynyń prezıdenti Olga Rypakovadan sheteldik sportshylarǵa el azamattyǵyn berip, olardy ulttyq quramaǵa qosý jaıly federatsııa ustanymyn surady. Sonymen qatar federatsııa basshysynan Qazaqstan atynan óner kórsetip júrgen jat jurt týmalarynyń nátıjelerine baǵa berýdi ótindi.

— Árıne, basty basymdyq árqashan Qazaqstanda ósken, bala kezinen osynda tárbıelenip, jattyǵyp kele jatqan óz sportshylarymyzǵa beriledi. Biraq meniń oıymsha, bul — álemdik tájirıbe, qazir keń taralǵan úrdis, ózge elderden kelgen sportshylar azamattyq alyp, halyqaralyq arenalarda belgili bir memlekettiń atynan óner kórsetip júre alady. Qazirgi kezeńde Qazaqstan azamattyǵyn alǵan sportshylarymyz ulttyq quramanyń músheleri retinde óz mindetterin tolyq kólemde oryndap júr. Nora Djerýtonyń arqasynda bizde álem chempıonatynyń medali bar. Meniń oıymsha, bul alǵashqy jáne sońǵy medal emes. Men buǵan senimdimin. Olardyń aldyna úlken mindetter qoıatyn bolamyz. Bul talaptar elimizde jattyǵatyn óz sportshylarymyzǵa qandaı bolsa, olarǵa da dál sondaı deńgeıde qoıylady, — dedi Olga Rypakova.

Sondaı-aq Jeńil atletıka federatsııasynyń prezıdenti «bolashaqta taǵy sheteldikterdiń el quramasyna qosylýy múmkin be» degen suraqqa jaýap berdi.

— Ázirge bul týraly oılanbadyq, degenmen qazir federatsııanyń negizgi maqsaty — balalar men jastar arasynda Qazaqstanda jeńil atletıkany damytý jáne tanymal etý. Sondyqtan qazirgi tańda negizinen osy baǵytta mindet qoıylyp otyr, — dedi ol.

Eske salaıyq, Nora Djerýto 2022 jyly ıÝdjınde ótken álem chempıonatynda Qazaqstanǵa jeńil atletıkadan alǵashqy altyndy alyp kelgen.

Bıyl qazaqstandyq jeńil atlet Deızı Jepkemeı Azııa chempıonatynda altyn qanjyǵalady.