Jeńil atletıkadan Qazaqstan quramasyna jańa bapker keldi
ASTANA. KAZINFORM — Endi otandyq jeńil atletterdi ýkraınalyq maman Aleksandr Apaıchev jattyqtyrady. Ol ulttyq quramanyń bas bapkeri mindetin de qosa atqarady, dep habarlaıdy uıymnyń baspasóz qyzmeti.
Búgin Astanada Qazaqstan Respýblıkasy Jeńil atletıka federatsııasynyń resmı jıyny ótti. QR Týrızm jáne sport vıtse-mınıstri Serik Jarasbaev, QR Sport jáne dene shynyqtyrý isteri komıtetiniń tóraǵasy Rýslan Esenalın, QR Jeńil atletıka federatsııasynyń prezıdenti Olga Rypakova, bas hatshy Kelbet Nurǵazına men bapkerler, tóreshiler jáne ulttyq qurama sportshylary qatysqan basqosýda birqatar mańyzdy sheshim qabyldandy.
Atap aıtar bolsaq, jeńil atletıkadan Qazaqstan ulttyq quramasyna jańa keńesshi-bapker taǵaıyndaldy. Endi otandyq jeńil atletterdi ýkraınalyq maman Aleksandr Apaıchev jattyqtyrady. Ol ulttyq quramanyń bas bapkeri mindetin de qosa atqarady.
Aleksandr Apaıchev 1961 jyly 6 mamyrda Ýkraınada dúnıege kelgen. Uzaq jyldar boıy jeńil atletıkadan KSRO komandasynyń namysyn qorǵady. Bapker retinde Ýkraına men Qatar quramalaryn jattyqtyryp, Olımpıada, álem, Eýropa jáne Azııa chempıonattarynyń jeńimpazdary men júldegerlerin daıyndaǵan.
Jıyn barysynda Aleksandr Apaıchev Qazaqstan quramasynyń aldaǵy jattyǵý josparyn tanystyrdy. Basty maqsat — 2026 jyly ótetin jazǵy Azııa oıyndary men 2028 jyly ótetin Los-Andjeles Olımpıadasyna tyńǵylyqty daıyndalý.
Qazirgi tańda jeńil atletıkadan Qazaqstan quramasy jańa bapkerdiń jetekshiligimen Astana qalasynda oqý-jattyǵý jıynyn ótkizip jatyr.
Sondaı-aq, jıynda otandyq jeńil atletıkanyń damýyna erekshe úles qosqan bapkerler men tóreshiler nazardan tys qalǵan joq. Atap aıtar bolsaq, tóreshiler keńesiniń tóraǵasy Denıs Moseev pen QR Jeńil atletıka federatsııasynyń stastısti Larısa Ladına QR Týrızm jáne sport mınıstrliginiń arnaıy nagradasy — «Qurmetti sport qyzmetkeri» tósbelgisimen marapattaldy.
Sonymen qatar, Bahreınde ótken jasóspirimderdiń jazǵy Azııa oıyndarynda júlde alǵan qazaqstandyq jas atletter men olardyń jeke bapkerlerine QR Týrızm jáne sport vıtse-mınıstri Serik Jarasbaevtyń atynan arnaıy alǵys hattar tabystaldy. Búgingi jıynǵa Azııa oıyndarynda júlde alǵan sportshylar arasynan Murat Nurbolsyn (3000 metrge júgirý, qola medal) men onyń jeke bapkeri Baqdáýir Úlkenbaı qatysty.
Budan buryn Qyzylorda fýtbol klýbynyń bapkeri aýysqanyn jazǵan edik.