Jeńil atletıkadan Qazaqstan áıelder quramasy estafeta jarysynda jeńiske jetti

ASTANA. KAZINFORM – Qytaıda ótip jatqan jeńil atletıkadan jabyq ǵımarattaǵy Azııa chempıonatynda Qazaqstan áıelder quramasy estafeta jarysynda máre syzyǵyn birinshi bolyp qıdy.

Saıys barysynda 4x400 metr qashyqtyqta el namysyn Marııa Shývalova, Anna Shýmılo, Krıstına Kondrashova jáne Adelına Zems qorǵady.

Fınalda Qazaqstan quramasy 3:38.02 nátıjesimen Qytaı quramasyn artta qaldyryp, Azııa chempıony atandy. Ekinshi oryn ıelengen Qytaı sportshylarynyń kórsetkishi – 3:38.29.

Aıta ketsek, qazirge deıin qurlyqtyq dodada elimizdiń atynan Nadejda Dýbovıtskaıa bıiktikke sekirýden kúmis júldeni mise tutsa, Alına Chıstıakova bessaıysta jeńis tuǵyryna kóterildi. Sondaı-aq Nora Djerýto 3 000 metrge júgirý saıysynda chempıon atansa, 1 500 metr qashyqtyqta qola júldege ıe bolǵan edi.

Qurlyqtyq doda búgin máresine jetedi. Oǵan Asian Athletics quramyna kiretin 24 eldiń sportshylary keldi.

Azııa birinshiligi baǵdarlamasyna sáıkes erler men áıelder arasynda júgirý jáne kedergiler arqyly júgirý, 4×400 m estafetasy, sekirý túrleri, ıadro serpý jáne kópsaıys (jetisaıys) sekildi 26 sport túrinen júldeler sarapqa salynyp jatyr.