Jeńistiń 70 jyldyǵyna arnalǵan Astanadaǵy áskerı sherýge ataqty «Katıýsha» qatystyrylady (FOTO)

ASTANA. QazAqparat - Jeńistiń 70 jyldyǵyna arnalǵan Astanadaǵy áskerı sherýge ataqty «Katıýsha» qatystyrylady, dep habarlady QR Qorǵanys mınıstrliginiń baspasóz qyzmetinen.

«Uly Otan soǵysyndaǵy Jeńistiń 70 jyldyq mereıtoıyna arnalǵan áskerı parad tarıhı jáne zamanaýı eki bólimnen turady.

Paradqa qatystyrý úshin soǵys ýaqytynda paıdalanylǵan 40-qa jýyq qarý-jaraq, áskerı jáne avıatsııalyq tehnıka jóndeýden ótedi»,- delingen habarlamada.

Sharanyń tarıhı bóliminde UOS jyldary qoldanylǵan tehnıkanyń 36 túri tartylady. Olardyń ishinde, 27 áskerı tehnıka men qarý-jaraq (T-34 tanki, ZIS-2 zeńbiregi jáne M-30 gaýbıtsaly ZıL-157, tanymal BM-13 RS-30 «Katıýshasy» jáne «Maksım» zeńbiregi), sondaı-aq, 9 ushý quraly (AN-2 jáne TL-2000) bar. Tehnıkalardy tıisti qalypqa keltirý úshin olar «Semeı ınjınırıng» zaýytynda jóndeýden ótip jatyr.

Sonymen qatar bul paradqa qatysatyn 300-den astam qazaqstandyq áskerı qyzmetshi Qyzyl armııa formasyn kıedi.