Jeńistiń 65 jyldyq mereıtoıy qarsańynda 350 qazaqstandyq ardager baspanaly bolady - G.Ábdiqalyqova
Bul týraly búgin jýrnalısterge bergen suhbatynda QR Eńbek jáne halyqty áleýmettik qorǵaý mınıstri Gúlshara Ábdiqalyqova málim etti, dep habarlaıdy QazAqparat.
Mınıstrdiń aıtýynsha, búgingi kúni respýblıka boıynsha baspana kezeginde turǵan ardagerlerdiń sany 1 myńnan asyp jyǵylady. Olardyń 750-ine páter kiltterin aǵymdaǵy jyly berý josparlanýda. Onyń 350-i qonys toıyn Uly Jeńistiń 65 jyldyq mereıtoıy qarsańynda toılaıtyn bolady.
«Ardagerlerge páter berý jáne olardyń tumystyq jaǵdaıyn jaqsartý meıramnyń aldynda ǵana emes, úılerdiń qurylystarynyń aıaqtalýyna, jergilikti bıýdjettiń ol úılerdi satyp alý úrdisine baılanysty - jyl boıyna atqarylatyn sharalar», - dep atap ótti G.Ábdihalyqova.
Aıta keteıik, mereke qarsańynda baspanaly bolatyn 350 ardagerdiń - 55-i Astana qalalyq Turǵyn úı basqarmasynyń kezeginde turǵandar.
Qala ákimdiginiń málimetterine sáıkes, 2008 jyly elorda basshysy Imanǵalı Tasmaǵambetovtyń tapsyrmasymen kezekte turǵan qalǵan barlyq 104 ardagege baspana berilip, elordada bul másele tolyǵymen sheshilgen bolatyn. Degenmen, 2008-2009 jyldar aralyǵynda óńirlerden kelgen 20 ardager Turǵyn úı basqarmasynda jańadan tizim jasaqtady, Jeńis kúni qarsańynda olardyń barlyǵyna úıdiń kiltteri tabys etildi. 2009-2010 jyldar ishinde bul tizimge taǵy 55 ardager alyndy. Onyń 20-sy mamyrdyń 7-si kúni Táýelsizdik saraıynda ótetin saltanatty shara barysynda páter kiltterin Elbasynyń qolynan alady dep kútilýde.
