Jeńistiń 65 jyldyǵyna baılanysty Qyrǵyzstanda raqymshylyq jarııalandy
ASTANA. Mamyrdyń 5-i. QazAqparat - Qyrǵyzstannyń jańa úkimeti Uly Jeńistiń 65 jyldyǵyna jáne eldegi bıliktiń aýysýyna ákelgen sáýirdiń 6-8-i aralyǵyndaǵy qaıǵyly oqıǵaǵa qatysýshylardyń qurmetine elde raqymshylyq jarııalady. Bul týraly úkimettiń baspasóz qyzmetinen habarlady. Úkimet jetekshisi Roza Otynbaeva sáıkes qujatqa seısenbi kúni qol qoıdy,
dep habarlaıdy «Maıak» radıosy.
Qyrǵyzstannyń ýaqytsha úkimetiniń sheshimi boıynsha, raqymshylyq jarııalanýyna baılanysty Chernobyl apatynyń saldaryn joıýǵa qatysýshylar men olardyń jesirleri, 55 jastan asqan áıelder, 60 jastan joǵary er azamattar, sondaı-aq birinshi jáne ekinshi toptaǵy múgedekter men 3- jáne 4-shi satydaǵy onkologııalyq aýrýlarymen aýyratyn naýqastar qylmystyq jaýapkershilikten jáne jazadan bosatylady.
Raqym jasalǵandardyń tizimine sondaı-aq, qamqorlyǵynda kámeletke tolmaǵan eń kem degende eki balasy bar otbasynyń jalǵyz asyraýshylary, KSRO-nyń nemese Qyrǵyzstannyń múddelerin qorǵaý jónindegi jaýyngerlik operatsııalarǵa qatysýshylar, shartty merzimge kesilgender kirip otyr. Oǵan qosa, áskerı bólimderin tastap qashyp ketken sarbazdarǵa da raqymshylyq jasalyp otyr. Dekretke sáıkes, túrmede otyrǵandardyń taǵy biraz bóliginiń jaza merzimderi 50 paıyzǵa qysqartylady.
