JEŃІSKE DEIІN 26 KÚN: Nemis-fashıstik basqynshylardan avstrııalyq astana azat etildi
1945 jyly 13 sáýirde 3-shi Ýkraındyq maıdannyń áskeri 2-shi Ýkraındyq maıdany áskeriniń kómegimen Vena qalasyn basyp aldy. Avstrııa astanasyn nemis-fashıstik basqynshylardan azat etý úshin aıqasta keńes áskeri aıryqsha erlik kórsetti.
13 sáýir kúni marshal Tolbýhınniń áskeri qala úshin aıqasta 5 myńǵa jýyq nemis, vengr sarbazy men ofıtserlerin joıdy. 107 tank pen ózdiginen júretin qondyrǵy, 135 zeńbirek, 615 avtokólik pen basqa da kóptegen qarý-jaraqtar tárkilendi.
KSRO Joǵarǵy Keńesiniń Prezıdıýmy «Venany alǵany úshin» medalimen 270 myńnan astam áskerdi marapattady. Onyń ishinde Batys Qazaqstan oblysynyń týmasy Keńes Odaǵynyń batyry, avıatsııa polkovnıgi Alekseı Chýrılın de bar.
1945 jyly 3 sáýirde 25 sáýirge deıin jalǵasqan Baltyq flotymen ózara is-árekette 3-shi Belarýs maıdany áskeriniń Zemlandııalyq shabýyl operatsııasy bastaldy. Saǵat 8-de artıllerııalyq, avıatsııalyq daıyndyq bastaldy. 9-da maıdan áskeri shabýyldy bastady. Keńes áskerleri nemis tobyn ydyratyp, keıinnen olardy bólim-bólimmen joıý úshin Fıshgaýzen baǵytyndaǵy ortalyqta basty soqqy berdi. Qarsylas jaǵy da joıqyn jarylyspen qarsylyq kórsetti. Shabýylshy bólim birinshi qorǵanys jolaǵyna basa-kókteı kirgende, qarsy shabýyl údep ketti...
Sol ýaqytta, Chehoslavakııada Sovınformbıýro habarlaǵandaı, 2-shi Ýkraındyq maıdan áskeri shabýyldy jalǵastyrý ústinde bolatyn. Keńes áskerleri shalshyq, ótýi qıyn jerlermen alǵa jyljyp, Mala Býda eldi mekeninen jetti. Artıllerııalyq atyspen qorǵanyp, Morava ózenin kesip ótti. Jaýdyń qarsy shabýylyn eńsere otyryp, bizdiń bólimshe Godonın qalasynan soltústik-shyǵys baǵytyna qaraı ótetin temir joldan ótti. Qalǵan áskerler tańerteń Morava arqyly Godonınge jetip, ekpindi soqqymen qaladan ońtústik-bastys baǵytqa qaraı ótetin temir, tas joldy kesip ótti. Godonın qalasyn qoldan bermeý úshin emister jan aıaspaýǵa bekindi. Olar qalany qorǵaýǵa tyrysyp, shet-shetterge artıllerııalyq jáne zeńbirek dottaryn ornatty. Keńes áskerleri ekpindi shabýylmen soltústik-shyǵystan jáne ońtústik-batystan qalaǵa basa-kókteı kirdi. Joıqyn aıqasta bizdiń ásker qarsylas garnızonyn qulatyp, túske qaraı Chehoslavakııanyń aýdandyq oralyǵy, qatynas joldarynyń mańyzdy toraby - Godonın qalasyn basyp aldy. Aıqasta nemistiń jaıaý áskeri talqandalyp, 350 adam tutqyndaldy, kóptegen qarý-jaraqtar tárkilendi.
Jeńiske 26 kún qaldy.
