«Jeńiske 75 jyl» kollektsııalyq monetasy 8 maýsymda satylymǵa shyǵady

NUR-SULTAN. QazAqparat - Ulttyq bank nomınaly 500 teńgelik - kúmisten, nomınaly 100 teńgelik - MN 25 melhıor qospasynan jáne nomınaly 100 teńgelik - neızılber qospasynan jasalǵan «Jeńiske 75 jyl» kollektsııalyq monetasyn 8 maýsymnan bastap aınalysqa shyǵarady. Bul jóninde qarjy uıymynyń baspasóz qyzmetine silteme jasap QazAqparat habarlaıdy.

Monetany Qazaqstan Ulttyq bankiniń barlyq aýmaqtyq fılıaldarynan satyp alýǵa bolady. Fılıaldar mekenjaıy Ulttyq banktiń

saıtynda

jazylǵan. Nomınaly 500 teńgelik kúmis jáne nomınaly 100 teńgelik MN 25 melhıor qospasynan jasalǵan «Jeńiske 75 jyl» kollektsııalyq monetasy qarjy ınstıtýtynyń ınternet-dúkeninde de satylady.

Monetanyń dızaınyna Ulttyq bank Jeńistiń 75 jyldyǵyn merekeleý sheńberinde ótkizilgen «Jeńis monetasyn jasa» jalpy respýblıkalyq konkýrs jeńimpazdarynyń ıdeıalaryn paıdalandy.

«Jeńiske 75 jyl» monetasynyń grafıkalyq kompozıtsııasynyń negizinde soǵys ákelgen alapatty sıpattaıtyn qabyrǵanyń bólingen jaryǵy aıasynda sovet jaýyngeriniń stıldendirilgen beınesi bar.

Aldyńǵy jaǵynda máńgilik ottyń beınesi, onyń jalynynan jer betindegi beıbitshilik úshin sovet jaýyngerleri ómirleriniń nyshany ispettes kógershinderdiń kókke samǵaǵan beınesi kórsetilgen.

Kompozıtsııanyń oń bóliginde – qalampyr gúliniń stıldendirilgen beınesi. Joǵary bóliginde – mereıtoılyq datalardy bólip turǵan jáne jaýyngerdiń beınesin ustap turǵan bes qyrly juldyz beınelengen.

Monetanyń reversindegi jazý kırıllıtsada oryndalǵan, bul sol ýaqyttaǵy oqıǵalarmen tarıhı baılanysty basa kórsetedi.

Monetalar kollektsııalyq quny boıynsha satýǵa arnalǵan.

Nomınaly 500 teńgelik jáne 100 teńgelik kollektsııalyq monetalar barlyq tólemder boıynsha Qazaqstan Respýblıkasynyń búkil aýmaǵynda olardyń belgilengen qunymen qabyldanýǵa, sondaı-aq bank shotyna esepke jazylýǵa jáne aýdarylýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady.

Eske sala keteıik, kollektsııalyq monetalar aınalysqa 27 naýryzda shyqqan bolatyn. Alaıda elde jarııalanǵan tótenshe jaǵdaıǵa baılanysty monetany satý keıinge shegerildi.