JEŃІSKE 70 JYL: Erjúrek Álııa soǵystan tiri qaıtqanda osy kóılekti kıip júrer edi ǵoı...
Máskeýde Álııa Moldaǵulova atyndaǵy kóshe jáne sol kósheniń boıynda batyr qyzdyń atyndaǵy mektep bar. «Almaty aqshamynda» jarııalanǵan saıası sholýshymyz, belgili jýrnalıst Á.Amangeldiniń «Men kórgen mınıstr» (7.05.2015) atty maqalasynda mynandaı derek kezdesedi. «...№891 mektep. Mektepte batyr qyzǵa arnap mýzeı ashylǵan. Mýzeıde Álııanyń ómirine qatysty jádigerlik zattar: qazaq qyzdary kıetin uzyn jeń, keń etekti búrmeli kóılek pen ádemi oıý-órnekti kamzol, bir baý bıdaı, pılotka men snaıper myltyǵynyń oǵy, t.b. qoıylǵan...».
Osyndaǵy jádigerlik zattardyń ishinen qazaq qyzdary kıetin uzyn jeń, keń etekti búrmeli kóılek pen ádemi oıý-órnekti kamzol erekshe nazar aýdartady. Álııa kıgen uzyn jeń, keń etekti búrmeli kóılek pen ádemi oıý-órnekti kamzoldy mereke, ásirese, naýryz kúnderi bolmasa, siz qazir mektepte ne bolmasa oqý ornynda Álııa kıgen kóılek pen kamzol kıip júrgen jasty kórdińiz be? Jaraıdy, mektepte ruqsat etilmeıdi eken, onyń óz kıim formasy (ony kıip júrgenine de kúmándimin) bar delik. Al endi, kóshege kıip shyqsańyz, bireý sheship almaıdy ǵoı. Erjúrek, namysty qyz Álııa soǵystan tiri qaıtqanda osy kóılekti kıip júrer edi ǵoı dep oılaısyń. Óıtkeni, ol ult namysyn birinshi kezekte oılaıtyn jas edi. Bireýlerdiń zaman basqa, zań basqa, qazirgi jastar basqa ǵoı deıtinderin bilip otyrmyn. Biz osylaı sóıleýge ábden úırenip alǵanbyz. Bizdi qurtatyn da osy sóz. Bolmasa ózgege emes, ózińe uqsap júrgenge ne jetsin! Kóshege shyǵyńyzshy, shurq-tesik djınsı, sholaq shortık, ashylǵan kindik, shashylǵan shashtan basqa ne kóresiz.
R.S. Bir zamanda mýzeıden uly ǵalym Qanysh Sátbaevtyń etigin kórip qatty tolqyǵanym bar edi. Sodan keıingi tolqýym osy. Orystar murajaıǵa qoıýǵa batyr qyzdyń kóıleginen basqa qoıatyn nárse taba almaı qaldy deısiz be? Bálkim, qazaqtar ulttyq kıimderin endi tek mýzeıden ǵana kóretin bolady dep oılady ma eken. Kim bilsin?!
Qalı Sársenbaı
