JEŃІSKE 2 KÚN QALDY: Germanııa Qarsylyqsyz tize búgý týraly Aktige qol qoıdy

ALMATY. QazAqparat - Búgin, 1945 jyldyń 7 mamyryna qaraǵan túni - 2 saǵat 41 mınýtta, ıaǵnı, soǵystyń 1416 kúni Frantsııanyń soltústik-shyǵysynda ornalasqan Reıms qalasynda natsıstik Germanııa qarýly kúshteri bas qolbasshylyǵynyń operatıvtik shtabynyń bastyǵy, general-polkovnık Alfred Iodl bastaǵan nemis delegatsııasy barlyq maıdanda Qarsylyqsyz tize búgetinderi týraly Aktige qol qoıdy.

AQSh qarýly kúshteriniń generaly, Odaqtastar áskerleriniń qolbasshysy Dýaıt Eızenhaýerdiń shtabynda ótken bul rásimge anglo-amerıkalyq taraptan AQSh armııasynyń general-leıtenanty, Odaqtyq ekspedıtsııalyq qarýly kúshterdiń Bas shtabynyń bastyǵy Ýolter Bedel­l Smıt, KSRO tarapynan odaqtastar qolbasshylyǵy janyndaǵy Joǵarǵy Bas qolbasshylyq shtabynyń ókili, general-maıor Ivan Sýslaparov jáne Frantsııa tarapynan general Fransýa Sevez qatysty.

Natsıstik Germanııanyń qurlyqtaǵy, áýedegi jáne teńizdegi qarýly kúshteriniń tize búgýi 8 mamyr kúni 23 saǵat 01 mınýtta (ortasha eýropalyq ýaqyt boıynsha) kúshine endi.

Aıta ketelik, bul qujat aǵylshyn tilinde jazylǵan bolatyn. Alaıda, Stalınniń úzildi-kesildi talaby boıynsha natsıstik Germanııa úkimeti «jeńimpazdardyń jerinde emes, ózderiniń jeńilgen jerinde, fashızmniń ordasy - Berlınde, Keńes áskerleri qarýly kúshteri qolbasshylyǵynyń qatysýmen» ekinshi qaıtara Qarsylyqsyz tize búgý Aktisine qol qoıatyn bolyp sheshildi.

Al «Sotsıalıstik Qazaqstan» gazetiniń 1945 jyldyń 9 mamyryndaǵy (sársenbi) №90-shy sanynda jaryq kórgen Keńes aqparat bıýrosynyń 7 mamyrdaǵy urystar málimeti tómendegideı:

«1-shi BELORÝS maıdanynyń áskerleri MAGDEBÝRG qalasynyń soltústik jáne soltústik-shyǵys tusynan ELЬBA ózenine shyǵyp, GEKTIN men TsERBST qalasyn jáne ShENHAÝZEN, BERGTsOV, PAREI, ShARTAÝ, GERVISh, LEITTsKAÝ, GERDEN, VALЬTERNINBÝRG, ShTOITTs eldi mekenderin aldy.

Al, 6-shy mamyr - soǵystyń 1415 kúni bolǵan urystar barysynda maıdan áskerleri BRANDENBÝRG qalasynyń soltústik jáne soltústik-batys jaǵynda alǵa jyljı otyryp, ZANDAÝ, VÝLЬKAÝ, KLITTs, FERHELЬ, FIRITTs, ShLAGENTIN, PLAÝE, GROSS-VÝSTERVITTs, KADE, KA-ROV eldi mekenderin alǵan bolatyn. Osy kúni maıdan áskerleri 3100 nemis soldaty men ofıtserin qolǵa túsirip, áýejaıdan 34 jaý ushaǵyn oljalady.

5-shi mamyrdaǵy urystar barysynda 17120 nemis soldaty men ofıtseri tutqyndaldy.

1-shi ÝKRAIN maıdanynyń áskerleri 7-shi mamyr kúni uzaqqa sozylǵan qorshaýdan keıin BRESLAVLЬ (BRESLAÝ) qalasyn ári qamalyn aldy.

Qamaldyń komendanty, general fon Nıgof basqarǵan garnızon qarsylyqty toqtatyp, qarýlaryn tastap, tutqynǵa tústi.

7 mamyr kúni 19 saǵatqa qaraı, bizdiń áskerler BRESLAVLЬ qalasynda nemisterdiń 40 000 astam soldaty men ofıtserin tutqyndady.

4-shi ÝKRAIN maıdanynyń áskerleri MORAVSKA OSTRAVA qalasynyń batys jáne ońtústik-batys jaǵynda shabýyl jasaı otyryp, FREIDENTALЬ, FRID-LAND na MORAÝ, MERISh-NEIShTADT, ShTEPANOV qalalaryn jáne VILЬDGRÝB, ShÝMVALD, MEDLOV, HVALKOVITsE, ShMEILЬ, SPALOV, ODRY, PALAChOV, LEShNA iri eldi mekenderin uryspen aldy.

Al 6-shy mamyr - soǵystyń 1415 kúninde osy maıdannyń áskerleri osy baǵytta urys júrgize otyryp, BENISh, ShTERNBERG, PRJIBOR, NOVYI IIChIN, FRENShTAT, VALASh MEJIRIChI, GOLEShOV qalalaryn alǵan bolatyn. Osy jáne 5 mamyrda bolǵan urystarda maıdan áskerleri nemisterdiń 3000 astam soldaty men ofıtserin qolǵa túsirdi.

5-6 mamyr aralyǵynda áýe urystarynda zenıttik artıllerııanyń kúshimen jaýdyń 10 ushaǵy atyp túsirildi.

Aıta ketelik, 6 mamyr kúni Pragany azat etý operatsııasy bastaldy. Ol 11 mamyrǵa deıin sozyldy. Oǵan 1-shi, 4-shi jáne 2-shi Ýkraın maıdanynyń áskerleri jáne Polsha áskeriniń 2-shi armııasy, 1-shi jáne 4-shi rýmyn armııalary jáne 1-shi chehoslovakııalyq armııalyq korpýs qatysty» - delingen málimette.