Jeńisimdi qazaq eline arnaımyn - Aıbek Nuǵymarov
«Shyny kerek, bes balýanmen ótken kezdesýdiń bári de ońaıǵa túsken joq. Onyń ústine oraza ustaǵan edim. Sodan azdap álsizdik boldy. Oraza aıynyń bitkenine de úsh-aq kún boldy ǵoı. Alla buıyryp, búgin jeńimpaz atandyq», - dedi Aıbek Nuǵymarov týrnırden keıin tikeleı efırde «Qazsport» tilshisine bergen suhbatynda.
Eki dúrkin «Qazaqstan barysy» jáne eki dúrkin «Álem barysy» búgingi jarysta jeńis ońaı kelmegenin moıyndady.
«Birinshiden, ózińiz biletin Dáýlethan Jaqypov atty óte abyroıly, tájirıbeli sportshymen shyqtym. Ekinshi qarsylasym - Dáýren baýyrym da myqty. Odan keıingi Muhıt baýyrymdy da jeńý ońaı bolǵan joq. Sosyn almatylyq Rýslan Ábdirazaqovpen shyqtym. Bári de - «sen tur, men ataıyn» degen balýandar ǵoı. Fınalda da Erasyl baýyrymmen beldesip, edáýir sharshadym. Óıtkeni, barlyǵymen tolyq bes mınýt beldesip shyqtym. Aýyrlaý boldy», - dedi ol.
Aıbek Nuǵymarov sondaı-aq «qazaq kúresimen shuǵyldanýdy jalǵastyrasyz ba, álde joq pa?» degen suraqqa jaýap berdi.
«Kúresti qoıamyn dep aıta almaımyn. Kúresti qoıatyn bir reti keler. Buıyrsa, kelesi jyly da kúresýge tyrysam. Jeńisti eń aldymen úıdegi áke-shesheme, qazaq eline, shyǵysqazaqstandyqtarǵa arnaımyn», - dedi Aıbek Nuǵymarov.
Eske sala ketsek, elordada ótken «Qazaqstan barysy-2019» týrnırinde Aıbek Nuǵymarov jeńimpaz atandy. Fınalda ol shyǵysqazaqstandyq taǵy bir balýan Erasyl Qajybaevtan aılasyn asyrdy.
Týrnırde ekinshi jáne úshinshi oryndy Erasyl Qajybaev pen Rýslan Ábdirazaqov ıelendi.
Qazaqstan barysy atanǵan Aıbekke 25 mıllıon teńgeden bólek, altyn belbeý men altynnan quıylǵan aýyspaly «Taıtuıaq» tabys etildi. ІІ jáne ІІІ orynǵa ıe bolǵan Erasyl Qajybaev pen Rýslan Ábdirazaqovqa 5 mıllıon jáne 1 mıllıon 800 myń teńge berildi. Sonymen qatar palýandarǵa ár jeńisi úshin 100 myń teńge aqshalaı syılyq tabystaldy.
Aıta keterligi, Aıbek Nuǵymarov 2013 jyly da «Qazaqstan barysy» atanǵan bolatyn.
