Jeńisimdi 9 aılyq sábıime arnaımyn - A. Lýtsenko
ALMATY. QazAqparat- Búgingi jeńisimdi 9 aılyq sábıime arnaımyn. Búgin Almatyda ótken halyqaralyq «Almaty týry 2014» bir kúndik tasjoldyq velojarysynyń jeńimpazy 22 jastaǵy Alekseı Lýtsenko osylaı dep málimdedi.
Jeńisinen keıin ile-shala jýrnalısterge bergen qysqasha ǵana suhbatynda ol bul jeńisten alǵan tamasha áserin aıtyp jetkize almaıtyndyǵyn bildirdi.
«Ózimniń «Astana» komandama alǵysym sheksiz. Jarys barysynda maǵan búkil komanda kómektesti. «Týr de Frans» kópkúndik velojarysynyń jeńimpazy Vıchentso Nıbalıdiń ózi eshteńege qaramastan sońǵy fınaldyq bıiktikti baǵyndyrýyma kúsh saldy. Ol jarys barysynda óte myqty aýysym jasap otyrdy. Márege eki shaqyrym qalǵanda «Katıýsha» komandasynyń veloshabandozymen birge sytylyp alǵa shyqtym. Nátıjesinde márege birinshi bolyp jettim», - dedi óz sózinde Alekseı Lýtsenko.
Petropavl qalasynyń týmasy endi týǵan jerine demalýǵa attanatyndyǵyn, otbasyn saǵynǵandyǵyn jetkizdi.
«Erteń úıge qaıtam. Al aldaǵy josparym jaıynda ázirge eshteńe aıta almaımyn. Endi 2015 jyldyń maýsymy boıynsha qatysatyn jarystar jaıyn «Astana» komandasynyń sporttyq dırektorlary men bas menedjer Aleksandr Vınokýrov sheshedi. Sondyqtan, qazir meniń bar oıym - tezirek úıge jetý», - dedi A. Lýtsenko.
Aıta ketelik, Alekseı Lýtsenko Ońtústik Koreıanyń Inchhon qalasynda ótken Azııa oıyndarynda jeke jarysta jeńimpaz atanǵan bolatyn. Ol 42 shaqyrymdyq qashyqtyqty 50 mınýt 28 sekýndta basyp ótti. Ol sonymen qatar, 2012 jyly 23 jasqa deıingi veloshabandozdar arasynda ótken toptyq jarysta Álem chempıony atanǵan.
