Jeńis úshin biz sońyna deıin kúrestik - qazaqstandyq shańǵyshylar E.Kolomına men S.Malahova-Shıshkına
ALMATY. 6 aqpan. QazAqparat /Elena Ilınskaıa/ - Azıadanyń sońǵy kúninde qazaqstandyq sportshylar klassıkalyq stıldegi 15 shaqyrymdyq mass-startta ekinshi jáne úshinshi oryndardy jeńip aldy.
Jarys aıaqtalǵannan keıin bizdiń sportshylar atap ótkendeı, olar jeńis úshin sońyna deıin kúresti, biraq jeńimpaz - japondyq Isıda Masako bizdiń sportshylardyń taktıkasyn bilip qalyp, jeńisti julyp aldy.
Elena Kolomınanyń aıtýynsha, óziniń ekinshi oryn ıelengenine esh ókinbedi:
- Jarys bastalar aldynda sharshaǵanym sezildi. Bir apta aýyr tıdi. Qazir úıge qaıtyp, jaqyndaryma barǵym keledi. Osyǵan qaramastan, jeńis úshin sońyna deıin kúrestik. Jarysta azdap sáttilik jetispeı qaldy.
Onyń aıtýynsha, keshe jáne búgin shańǵymen eshqandaı qıyndyq týǵan joq. Syrǵanaý jáne basqa sıpattary boıynsha biz japondyqtardan kem túspedik. Jalpy alǵanda, Qazaqstan komandasy Azııa oıyndarynda tamasha óner kórsetti. «Qoldaý kórsetken jankúıerlerge erekshe alǵysymdy bildirgim keledi. Men bul jarysty máńgi esimde saqtaımyn», - dedi ol.
15 shaqyrymdyq mass-start jarysynda qola júldeger atanǵan Svetlana Malahova-Shıshkına máreden soń, qazaqstandyqtardyń báseke barysynda qoldanǵan taktıkasy jaıly baıandap berdi: "Jalpy, mass-start boıynsha maman emespin, men jekeleı jarysta jaqsyraq óner kórsetemin. Al búgingi saıysta bir ǵana maqsatym boldy - japondyq Isıdo Masakony bógep, oq boıy ozdyryp almaý. Biraz ýaqyt men sportshyǵa ilesip júgirdim, biraq, ol josparymyzdy tez túsinip, birden jyldamdyǵyn údetti. Sosyn Elena Kolomınaǵa japondyq sportshyny qýyp jetý úshin basymdy ızedim. Ókinishke qaraı, Isıdany qýyp jete almadyq. Biraq, bar kúshimizdi salǵanymyz ras. Keıbir qatelikterdi túzegiń kelse de, ótkendi qaıtara almaısyń ǵoı. Azıada bitýge de taıap qaldy, biraq osy maýsym qyzý áreketke áli de toly. Biz alda álem Kýbogy kezeńine qatysamyz".
