Jeńis toıyn toılaýǵa zor úles qosqan jankúıerlerge úlken alǵys bildiremin - «Shahterdiń» bas bapkeri V. Kýmykov
ASTANA. 21 tamyz. QazAqparat - Keshe elordadaǵy «Astana-Arena» stadıonynda fýtboldan ÝEFA Chempıondar lıgasynyń irikteý synynyń aqtyq kezeńinde Shotlandııa chempıony «Seltıkti» 2:0 esebimen utqan qaraǵandylyq «Shahterdiń» bas bapkeri Vıktor Kýmykov match sońyndaǵy baspasóz máslıhatynda toptyq kezeńge shyǵýǵa shotlandyqtardyń múmkindikteri áli de basymyraq dep esepteıtinin aıtty.Bul týraly Sports.kz habarlaıdy.
- Seltık sekildi azýly qarsylasty eki dop aıyrmasymen utamyz dep oıladyńyz ba?
- Barlyǵyn da oılaı berýge bolady. Biz búgingi matchqa kóp daıyndaldyq. Oıdaǵy josparymyzdy tolyǵymen júzege asyrdyq.
- Jeńistiń aýyly jaqyn ekenin qashan sezindińiz?
- Hıjnıchenko gol soqqanda, bizdiń jeńiske jetetinimizdi túsindim. Alaıda qarsylas oıynnyń sońynda shapshań fýtbolshylardy alańǵa jiberdi, sondyqtan esepti ustap turý ońaıǵa túspedi. Óz alańymyzda dop jibergimiz kelmedi.
-Búgin «Shahter» joǵary qarqyndy sapaly oıyn órnegin kórsetti. Elimizde eýropalyq deńgeıdegi ujym paıda boldy dep aıtýǵa negiz bar ma?
- Birtindep paıda bola bastady. Osy baǵytta jumys isteıtin bolsaq, mindetti túrde paıda bolady.
- On ekinshi oıynshy búgin qanshalyqty kómektesti?
- Árıne kóp kómektesti. Men stadıon tolsa, bizdiń jeńiske jetýge múmkindigimiz úsh eselenedi dep buǵan deıin de aıtqan bolatynmyn. Búgin jeńis toıyn toılaýǵa zor úles qosqan jankúıerlerge úlken alǵys bildiremin.
