Jeńis sherýine qatysqan batysqazaqstandyq maıdanger 100 jasqa toldy
Maıdangerdiń ǵasyrlyq toıyna oraı «Atameken» óner ortalyǵynda saltanatty jıyn ótti.
Onda oblys prokýrory Serik Shalabaev osy salanyń qurmetti qyzmetkeri Ivan Gapıchtiń ómir joldaryna toqtaldy.
QR Bas prokýrory apparatynyń basshysy Ǵalymjan Qoıgeldıev Ivan Gapıchti 100 jasymen quttyqtap, QR Prezıdenti Qasym-Jomart Toqaevtyń alǵyshatyn tabys etti.
Oblys ákimi Narıman Tóreǵalıev abyroı bıigine kóterilip otyrǵan Ivan Stepanovıchtiń ómirlik joly úlken-kishige úlgi ekendigin jetkizip, ıyǵyna shapan jaýyp, qurmet kórsetti.
Ardagerge basqa da syı-sııapattar tapsyryldy.
Shara barysynda maıdangerdiń ómiri arqaý bolǵan «Chelovek chestı ı dolga» atty kitap tanystyryldy.
Oblys kóleminde Ivan Gapıchtiń 100 jyldyǵyna oraı basqa da is-sharalar uıymdastyrylyp, derekti fılm daıyndaldy.
Ivan Stepanovıch Gapıch 1923 jyly 2 aqpanda Aqmola qalasynda dúnıege keldi. Bes jasqa tolǵannan keıin ata-anasy Qaraǵandy qalasyna qonys aýdardy.
Mektepte júrgende sportpen etene aınalysty. 1941 jyly sporttyq gımnastıkadan respýblıkalyq jarysqa barǵan kezde soǵystyń bastalǵany týraly habardy estip, keri qaıtty.
Sol sapardan oralysymen-aq orta mektepti bitirmese de, birden áskerı komıssarıatqa bardy. Bir jylǵa jasyn qosyp jazyp, óz erkimen maıdanǵa attandy.
Tashkenttegi radıotelegrafısterdi daıyndaıtyn áskerı mektepti bitirgennen keıin 1941 jyly qarashada Batys maıdan shtabynyń baılanysyn qamtamasyz etken 375-derbes radıodıvızıon quramyna alyndy.
Osy dıvızıon quramynda Smolensk, Belorýssııa, Lıtvany azat etý shaıqastaryna qatysyp, jeńisti Kenıgsbergte qarsy aldy.
Soǵys kezindegi batyrlyǵy úshin úshinshi dárejeli jaýyngerlik Dańq, Qyzyl Juldyz, ekinshi dárejeli Otan soǵysy ordenderimen, «Erligi úshin», «Jaýyngerlik eńbegi úshin» medaldarymen marapattaldy.
1945 jyly 24 maýsymda Máskeýde ótken Jeńis sherýine qatysqan maıdanger elge eki jyldan soń oraldy.
Almatyda 1951 jyly zańgerlik joǵary bilim alǵan Ivan Gapıchtiń beıbit ómirdegi qyzmeti tutastaı prokýratýramen baılanysty boldy.
Sonyń ishinde 1966 jyldan bastap jıyrma jyl ýaqyt boıy BQO prokýrorynyń birinshi orynbasary boldy.
1986 jyly zeınetke shyqqannan keıin oblystyń qoǵamdyq-saıası ómirine belsene aralasyp kele jatqan maıdanger «Qurmet» ordenimen de marapattaldy.
Qazirgi kezde oblysta Ekinshi dúnıejúzilik soǵysqa qatysqan 16 maıdanger qaldy.
Foto: Mádı Ǵubaıdýllın
