Jeńis Seıdýllauly: Jańa Qazaqstandy qurýǵa atsalysý – óskeleń urpaq aldyndaǵy mindetimiz

NUR-SULTAN. QazAqparat – Jańa Qazaqstandy qurýǵa atsalysý – óskeleń urpaq aldyndaǵy mindetimiz. Mundaı pikirdi Qazaqstannyń eńbek sińirgen qaıratkeri, «Roza Baǵlanova atyndaǵy «Qazakkontsert» memlekettik kontserttik uıymynyń dırektory Jeńis Seıdýllauly bildirdi, dep habarlaıdy QazAqparat tilshisi.

«Kúni keshe «Qazaqstan» ulttyq arnasynda Memleket basshysy Qasym-Jomart Kemelulynyń jańa suhbaty jaryq kórdi. Eldiń kókeıinde júrgen kóptegen ózekti saýaldarǵa jaýap aıtylǵan úlken suhbat boldy dep oılaımyn. Jańa Qazaqstandy qurýǵa baǵyt alǵan Prezıdentimizdiń pozıtsııasy, oılary men salmaqty sózderi kóńildi bir serpiltip, kópshiliktiń qoldaýyna ıe boldy», - dedi uıym dırektory.

Onyń atap ótýinshe, Prezıdent suhbatynyń mán-mańyzy tereńde jatyr.

«Prezıdenttiń sózderine qulaq asyp, qoldaý kórsetsek, eldegi kúrdeli máseleler tez arada óz sheshimin tabatyny anyq. Qasym-Jomart Kemeluly óz suhbatynda jaqyn arada elimizde saıası reformalar bolatynyn málimdedi. Qańtar oqıǵasynan endi ǵana es jıyp, qalypty ómirge oralǵan halyq shynymen de osy reformalardy zor úmitpen kútip júr. Halyqtyń talap-tilegi eskerilgen reformalar bolatynyna senimim mol. Biz de, óner adamdary, mádenıet qaıratkerleri jańa Qazaqstandy qurýǵa atsalysýymyz qajet. Sonda ǵana birligimiz bekemdelip, elimiz kórkeıe túspek. Bul – bizdiń óskeleń urpaq aldyndaǵy mindetimiz», - dedi Jeńis Seıdýllauly.