Jeńis Seıdýllauly: Úkimettiń qoldaýyna ıe bolǵan óner adamy tek bıikten kórineri anyq
«Memleket basshysynyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» Joldaýynda elimizdegi mańyzdy saıası, áleýmettik jáne ekonomıkalyq máseleleri jóninde sóz qozǵaldy. Qasym-Jomart Kemelulynyń saılaýaldy baǵdarlamasyna negiz bolǵan «Sabaqtastyq. Ádildik. Órleý» qaǵıdalary Joldaýda aıqyn kórinis tapty der edim. Qazaq mýzyka óneriniń qarashańyraǵyna aınalǵan «Qazaqkontsert» ujymy Joldaýda aıtylǵan halyqty áleýmettik qoldaýǵa qatysty ıgi bastamalardy erekshe yqylaspen qabyldady. Ásirese «Áleýmettik jańǵyrýdyń jańa kezeńi» bólimindegi «Mádenıet qyzmetkerlerin qoldaý» baǵyty barsha óner qyzmetkerleriniń jumysyna tyń serpin bererlik is-sharalardy qamtyǵan», - deıdi Jeńis Seıdýllauly.
«Qazaqkontsert» memlekettik kontserttik uıymynyń dırektory Prezıdent atap ótkendeı, mádenıet salasynyń qyzmetkerleri men óner qaıratkerleriniń áleýmettik jaǵdaıyn mindetti túrde jaqsartý kerek degen pikirde.
«Áleýmettik jaǵdaıy qarastyrylmaǵan, únemi qosymsha tabys kózin izdep júretin, materıaldyq turmysy tómen ónerpazdyń shyn ónerge adal bolýy ekitalaı. Al Úkimet tarapynan áleýmettik qoldaýǵa ıe bolǵan, eshbir alańsyz óz isine berilgen óner adamy shyǵarmashylyqta tek bıikten kórinetini anyq. Buǵan qosa, Joldaýda kórsetilgendeı, jas mamandar úshin jeńildigi bar turǵyn úılerdiń qoljetimdiligin qamtamasyz etý Elbasy jarııalaǵan bıylǵy «Jastar jyly» aıasynda asa ózekti. Bul, óz aldyna, shyǵarmashylyq quramynyń 80 paıyzy jastardan turatyn «Qazaqkontserttiń» ártisteri men óner ujymdaryna, olardyń jemisti eńbek etýine erekshe moraldyq stımýl beredi», - deıdi ol.
Sóz sońynda Jeńis Seıdýllauly Prezıdenttiń Joldaýynda kórsetilgen barlyq áleýmettik bastamalar sátti júzege asyrylatynyna senim bildirdi.
«Úkimettiń jan-jaqty qoldaýy men qamqorlyǵyn sezingen árbir jas talant barlyq kúsh-jigerin Uly Dala mádenıetiniń odan ári órkendeýine jumsary anyq», - dep túıindedi Jeńis Seıdýllauly.
Eske sala ketsek, kúni keshe Qazaqstan halqyna Joldaýyn jarııalaǵan Memleket basshysy Qasym-Jomart Toqaev Úkimetke mádenıet salasynyń qyzmetkerleriniń aılyǵyn kóterýdi tapsyrǵan bolatyn.
«Mádenıet qyzmetkerlerin qoldaý qajet. Biz mádenıet salasynda eńbek etetin adamdarǵa jetkilikti túrde kóńil bólmeı otyrmyz. Bul eń aldymen kitaphana, mýzeı, teatr qyzmetkerlerine qatysty másele. Olardyń eńbekaqysy sońǵy jyldary múlde kóbeıgen joq. Sonyń saldarynan mádenıet qyzmetkerleri, ásirese jas mamandar jeńildigi bar turǵyn úı baǵdarlamaryna qatysa almaıdy. Mundaı ahýal osy kásiptiń bedelin túsirip, laıyqty kadrlardyń tapshylyǵy aıqyn sezilýde», - dedi Prezıdent Qazaqstan halqyna Joldaýynda.
