Jeńis Seıdýllauly: Prezıdent Joldaýy halyqtyń ál-aýqatyn jaqsartýǵa zor úles qosatyny anyq
«1 qyrkúıek kúni jarııalanǵan Prezıdenttiń jyl saıynǵy Joldaýy elimizdegi jańa ózgeristerdiń bastaýyna negiz boldy. Táýelsizdiktiń 30 jyldyǵy qarsańynda jarııalanǵan «Halyq birligi jáne júıeli reformalar – el órkendeýiniń berik negizi» Joldaýy elimizdiń damý strategııasyn aıqyndap berdi. Memleket basshysy koronavırýs pandemııasyn jáne sonyń saldarynan bolǵan ekonomıkalyq daǵdarysty eńserýdiń naqty josparyn usyndy. Joldaýda kópshilikti tolǵandyryp júrgen suraqtar kóterilip, ashyq talqylandy. Bıylǵy Joldaýda halyqtyń ómir súrý sapasyn jaqsartýǵa basa mán berilgen. Ásirese Memleket basshysynyń eldegi eń tómengi jalaqyny 60 myń teńgege deıin ulǵaıtý týraly bastamasy qoǵam tarapynan keń qoldaý tapty. Sondaı-aq «Qazaqkontsert» ujymyn «Mádenıet qyzmetkerleri, qoryqshylar, kitaphanashylar, kólik júrgizýshilerdiń jalaqysy 2022-2025 jyldary aralyǵynda jyl saıyn 20 paıyzǵa arttyrý tapsyrylady», degen bastama erekshe qýantty»,- dedi ol.
«Qazaqkontsert» dırektorynyń atap ótýinshe, mádenıet salasyna kórsetilgen bul qoldaý onyń jańa qarqynmen damýyna yqpal etetin bolady.
«Bul bastamany júzege asyrý óte mańyzdy dep sanaımyn. Sebebi onyń ıgiligin 600 myń otandasymyz kóredi eken. Jańa Joldaýda Qasym-Jomart Kemeluly búgingi damýymyzdyń osal tustaryn da atap kórsetti. Sondyqtan elimizdiń árbir sanaly azamaty úshin bul Joldaý óte mańyzdy dep bilemin. Onyń tolyǵymen júzege asýy, jaqsy nátıje kórsetýi tek Úkimetke qana emes, halyqtyń belsendiligine de baılanysty. Barlyq ıgi bastamalar men mindetterdi júzege asyrý úshin bılik pen qoǵam birlese eńbek etýi qajet. Mańyzdy ári izgi isterge bastaıtyn bul Joldaý elimizdegi turaqtylyqty saqtaı otyryp, halyqtyń ál-aýqatyn jaqsartýǵa zor úles qosatyny anyq», - dedi Jeńis Seıdýllauly.
