«Jeńis rýhy» án baıqaýynyń jeńimpazdary gala-kontsert berdi
«Uly Jeńistiń 70 jyldyǵyna arnalǵan bul baıqaý qalamyzda tuńǵysh ret joǵary oqý oryndary arasynda ótkizildi. Oǵan barlyǵy 20 bilim berý mekemelerinen 50 stýdent qatysyp, óz ónerlerin ortaǵa saldy. Bul sharany ótkizýdegi basty maqsat - ata-babalarymyzdyń Uly Otan soǵysy jyldaryndaǵy erlikterin pash ete otyryp, búgingi jastardyń boıynda otanǵa degen súıispenshilik sezimdi, patrıottyq rýhty qalyptastyrý. Endi aldaǵy ýaqytta bul baıqaýdy jyl saıyn ótkizip turýǵa kúsh salamyz», - dedi óz sózinde T. Júrgenov atyndaǵy Qazaq ulttyq óner akademııasynyń rektory Bıbigúl Núsipjanova.
Sonymen qatar, Bıbigúl Nurǵalıqyzy QR Mádenıet jáne sport mınıstri Arystanbek Muhamedıulynyń baıqaýǵa qatysýshylarǵa arnaǵan quttyqtaýyn oqyp berdi.
«Án men mýzyka halyqtyń, zamannyń rýhymen órileri anyq. Soǵys jyldarynyń ánderi jáne sol surapyl soǵysqa arnalǵan ánder ár túrli taqyrypta bolyp keledi. Biraq olardy biriktiretin - adaldyq pen sezimtaldyq. Sol sebepten bul ánder - halyq murasy. Sondyqtan da olar eshqashanda umytylmaıdy! «Jeńis rýhy» baıqaýynyń qatysýshylaryna shyǵarmashylyq qýat pen tabystar tileımin», - delingen quttyqtaýda.
Aıta ketelik, baıqaý úsh kezeńde ótkizildi. Ótken aıdyń 10 sáýirinde aıaqtalǵan birinshi kezeńde joǵary oqý oryndary óz stýdentteri arasyndaǵy úzdik oryndaýshylardy anyqtady. Al 28 sáýirde ótken ekinshi kezeńde barlyq joǵary oqý oryndarynyń úzdik oryndaýshylary fınalǵa shyǵý úshin baq synasty. 29 sáýirde bolǵan aqtyq synda jeńimpazdar anyqtaldy.
Al búgingi sharada jeńimpazdar aqshalaı jáne baǵaly syılyqtarmen marapattaldy. Baıqaýdyń bas júldesin - estelik kýbok pen 100 myń teńgelik syıaqyny ál-Farabı atyndaǵy Qazaq ulttyq ýnıversıtetiniń stýdenti Abaı Shúıinshálı jeńip aldy.
Marapattaý rásiminen keıin jeńimpazdardyń gala-kontserti boldy.
«Jeńis rýhy» án baıqaýynyń basty uıymdastyrýshysy T. Júrgenov atyndaǵy Qazaq ulttyq óner akademııasy. Baıqaýǵa Qazaqstan Respýblıkasynyń Tuńǵysh Prezıdenti - Elbasynyń qory qoldaý kórsetti.
