Jeńis Nurlybaev djıý-djıtsýdan álemniń eki dúrkin chempıony atandy
ATYRAÝ. QazAqparat – Atyraýlyq sportshy djıý-djıtsýdan álemniń eki dúrkin chempıony atandy, dep habarlaıdy QazAqparat tilshisi.
Atyraý oblystyq Dene shynyqtyrý jáne sport basqarmasy baspasóz qyzmetiniń aqparatyna súıensek, Mońǵolııada djıý-djıtsýdan álem chempıonaty ótip jatyr.
«Mońǵolııada jalaýy jelbiregen eresekter men ardagerler sportshylar arasyndaǵy álem chempıonaty 15 shilde bastaldy. Álemdik dodaǵa 41 eldiń 500 sportshysy baq synap jatyr. Sportshylardyń arasynda Qazaqstan namysyn qorǵaǵan atyraýlyq Jeńis Nurlybaev 56 kelide synǵa tústi. Ol qarsylastarynyń bárinen basym túsip, djıý-djıtsýdan álemniń eki dúrkin álem chempıony atandy», - dep habarlady basqarmanyń baspasóz qyzmeti.
Bul – Jeńis Nurlybaevtyń álemdik dodadaǵy ekinshi jeńisi. Ol 2021 jyly Birikken Arab Ámirliginiń astanasy Abý-Dabı qalasynda sporttyń osy túrinen ótken álem chempıonatynda alǵashqy altyn medalge ıe bolǵan edi
Al Mońǵolııada ótip jatqan álem chempıonatynda atyraýlyq taǵy úsh sportshy tabysty óner kórsetti. Onyń biri – áıelder arasynda synǵa túsken Áıgerim Tóreǵojına kúmis medaldy ıelendi.
Sondaı-aq atyraýlyq ardager sportshy Rýslanhan Madyhanov ta álem chempıony ataǵyna qol jetkizdi. Taǵy bir ardager sportshy – Atyraý oblystyq djıý-djıtsý federatsııasynyń prezıdenti Esenǵalıev Aıbar qola júldege ıe boldy.
Eske sala ketelik, budan buryn Atyraýlyq jas shahmatshy qyz álemniń úsh dúrkin chempıony atanǵanyn habarlaǵan bolatynbyz.
Jasóspirim shahmatshy Zarına Nurǵalıeva 2019 jyly Belarýs Respýblıkasynda ótken álem chempıonatynda 12 jasqa deıingi jasóspirimder arasynda álem chempıony atanǵan. Byltyr Rýmynııadaǵy álem chempıonatynda ekinshi ret chempıon ataǵyn jeńip aldy. Al bıylǵy 5-11 maýsymda Grýzııanyń Batýmı qalasynda shahmattan jasóspirimder arasyndaǵy álem chempıonatynda úshinshi ret chempıondyq tuǵyrǵa kóterildi.
