Jeńis merekesine oraı astanalyq ardagerlerge beriletin tólem mólsheri artty

ASTANA. QazAqparat – 9 mamyr merekesine oraı mártebesi Uly Otan soǵysynyń ardegerlerimen teńestirilgen azamattarǵa beriletin tólem mólsheri artty. Elordanyń kommýnıkatsııalar qyzmetinde ótken brıfıngide Astana qalalyq Jumyspen qamtý jáne áleýmettik qorǵaý basqarmasy basshysynyń orynbasary Aıgúl Talasova osylaı málim etti, dep habarlaıdy QazAqparat tilshisi.

«9 mamyr merekesine oraı Uly Otan soǵysynyń ardegerlerimen teńestirilgen azamattarǵa, ózge shet memleketterdiń aýmaǵynda urys operatsııalaryna jumyldyrylǵan adamdarǵa beriletin tólem mólsheri ulǵaıdy. Atap aıtqanda, ol 9 AEK-ten (31 050 teńgeden) 35 AEK-ke (120 750 teńgege) deıin artty», - dep toqtaldy Aıgúl Talasova.

Sonymen birge, brıfıng barysynda basqarma basshysynyń orynbasary elordalyq zeınetkerlerge kórsetilip jatqan kómekterge toqtaldy. Onyń málimdeýinshe, qazirge deıin úıine gaz tartý úshin 700-den astam zeınetkerge qarjylaı qoldaý kórsetilgen.