Jeńis kúnine oraı qaraǵandylyq soǵys ardagerlerine 1 mln teńgeden beriledi

QARAǴANDY. QazAqparat – Jeńistiń 76 jyldyǵyn merekeleýge baılanysty Qaraǵandy oblysynda Ekinshi dúnıejúzi soǵysynyń ardagerleri birjolǵy tólem alady. Olardyń árqaısysyna mıllıon teńgeden tólenedi. Merekelik kúni beriletin tólem ótken jylǵy, mereıtoılyq deńgeıde qaldy, dep habarlaıdy QazAqparat tilshisi.

Sondaı-aq, oblystyń qalalary men aýdandarynyń bıýdjetterinde jeńildikter men kepildikter boıynsha soǵysqa qatysqandar men múgedekterge teńestirilgen tulǵalarǵa birjolǵy materıaldyq tólem qarastyrylǵan:

- kontslager tutqyndary – 200 myń teńge;

– Ekinshi dúnıejúzi soǵysy jyldarynda qaza tapqandardyń jesiri – 50 myń teńge;

– Qorshaýdaǵy Lenıngrad turǵyndary – 200 myń teńge;

– «UOS jyldaryndaǵy qajyrly eńbegi úshin» medalimen marapattalǵan tyl eńbekkerleri – 100 myń teńge;

- 1941 jylǵy 22 maýsym – 1945 jylǵy 9 mamyr aralyǵynda keminde alty aı jumys istegen (qyzmet ótkergen) jáne burynǵy KSRO ordenderimen jáne medaldarymen marapattalmaǵan adamdar – 50 myń teńge.

«Ardaǵym – ardagerim» aktsııasy aıasynda ardagerlerdi merekemen quttyqtap, olarǵa syılyqtar úrmeli aspaptar orkestriniń súıemeldeýimen beriledi.

Aıta ketý kerek, búginde oblysta barlyǵy 46 soǵys ardageri turady.