Jeńis kúnine arnalǵan sharalar Jánibek aýdanynda da ótkizildi
Jánibek - Stalıngrad maıdanyna baılanysty soǵys jaǵdaıynda dep jarııalanǵan eki aýdannyń biri. Sondyqtan munda soǵys izderi áli saırap jatyr. Baýyrlastar zıratynda 1942-1943 jyldary Jánibek aýylyndaǵy 1584-shi evakogospıtalde aýyr jaraqattan qaıtys bolǵan 93 jaýyngerdiń máıiti máńgilik jer qoınaýynda jatyr. Jeńis kúnine oraı osy zıratqa gúl shoqtary qoıyldy.
Aýdan ákiminiń orynbasary Rústem Qarashın bastaǵan jurtshylyq ókilderi Uly Otan soǵysynyń ardagerleri Andreı Prıstash pen Ǵazez Imanǵalıevtiń úıine baryp, aýdan ákiminiń alǵyshaty men eskertkish syılyq tabys etti.
Jánibek aýdanynda 9 mamyr - Jeńis kúnine oraı aýdan aktıviniń ókilderi maıdanda Otan úshin qasyq qanyn aıamaı, surapyl shaıqasta qaza tapqan jaýyngerler erligin ulyqtaý rásimi kezinde Keńes Odaǵynyń Batyry M.Mámetova men aýǵan bozdaqtary eskertkishine, «Máńgilik alaý» ornalasqan alańǵa qurmet retinde gúl destelerin qoıyp, el úshin qurban bolǵan sarbazdar rýhy 1 mınýt únsizdikpen eske alyndy.
Keıin salttantty mıtıng ótkizilip, aýdan ákimi Berik Esenǵalıev barsha turǵyndy Uly Jeńis merekesimen quttyqtady. Ortalyq alańda QR UQK shekara qyzmetiniń 2036-áskerı bólimi, aýdandyq ishki ister bólimi qyzmetkerleri men Jánibek kolledji, №1 jáne T.Jarokov atyndaǵy orta mektep oqýshylarynan jasaqtalǵan quramalardyń qatysýymen áskerı sherý uıymdastyryldy. Sonymen birge sahnada aqyn Dáýletkereı Qusaıynovtyń «Brestegi jánibektik jaýynger» (M.Nyǵmatýllın qurmetine shyǵarylǵan) balladasy jelisiniń negizinde teatrlandyrylǵan kórinis qoıyldy. Qoıylymnan soń, merekelik kontsert kezinde aýdan ónerpazdary Otan, týǵan el týrasynda patrıottyq ánder shyrqady. Sarbazdar qımyly, beıbitshilik tynysyn beınelegen bıler bılenip, arnaý óleńder oqyldy.
Basqa da aýdandarda osyndaı sharalar uıymdastyryldy.
