Jeńis kúni: Qorǵanys salasynyń ókilderi fashısterdiń tutqynynda qaza bolǵandardy izdestirýde
Qazaqstannyń Qarýly Kúshteri áskerı-tarıhı mýzeıi men Nur-Sultan qalasy qorǵanys isteri jónindegi departamentinde Ekinshi dúnıejúzilik soǵys kezinde qaza bolǵan jáne habar-osharsyz ketken qazaqstandyq jaýyngerlerdiń esimderi men jerlengen oryndaryn belgileý jumysy júrgizilýde. Alynǵan aqparat júıelendirilip, arnaıy málimetter bazasynda jınaqtalady.
«Adam tózgisiz azaptarǵa qaramastan jaýǵa satylmaǵan, fashıstik lagerlerde qaza bolǵan bozdaqtar – shyn máninde halqyna bergen antyna berik, Otanynyń naǵyz uldary ekenin dáleldedi. Bul – erlik! Olardyń barlyǵy da bolashaq úshin kúresti, ómir súrgisi keldi, jeńiske sendi! Fashıstik lagerlerdegi ashtyq pen sýyqqa, adam tózgisiz qorlyqtar men azaptarǵa moıymaı, Otany úshin janyn berdi. Esil erlerdiń esimderi jadymzda máńgi saqtalýy tıis!» – dedi Nur-Sultan qalasy qorǵanys isteri jónindegi departamentiniń shtab bastyǵy, podpolkovnık Aıdyn Saǵynbekov.
Atalǵan jumys aıasynda Qazaqstan Respýblıkasyndaǵy Germanııa elshiliginiń qoldaýymen kontslagerlerde bolǵan qazaqstandyq áskerı tutqyndardyń kartalary izdestirilýde.
Búgingi kúni júzdegen áskerı tutqyndar týraly aqparat engizildi. Qoǵam nazaryna qazaqstandyq áskerı tutqyndardyń tizimi men olardyń aty-jónderi, jerlengen oryndary usynyldy.
«Týysqandary tabylǵan jaǵdaıda kelesi mekenjaıǵa hat arqyly habarlasýyn suraımyz: Nur-Sultan qalasy, Respýblıka dańǵyly 2-úı, Qazaqstan Respýblıkasy Qarýly Kúshteriniń Ulttyq áskerı-patrıottyq ortalyǵy. Qosymsha tizim berilgen», - delingen baspasóz habarlamasynda.