Jeńis kúni - barsha halyq úshin qasterli de qasıetti meıram - Muhtar Ájiǵulov
Otanyn qorǵap, qan maıdanda qaza tapty. Sondyqtan bizder beıbit kúnniń qadirin jaqsy bilemiz. Bul týraly oblys ortalyǵynda turatyn soǵys jáne eńbek ardageri, Oral qalasy, Bókeı ordasy jáne Syrym aýdandarynyń qurmetti azamaty Muhtar Ájiǵulov málim etti, dep habarlaıdy «QazAqparat» tilshisi.
Óziniń aıtýynsha, ol qazirgi Atyraý oblysy Qurmanǵazy aýdany Azǵyr aýyldyq keńesinde 1922 jyly 1 mamyrda ómir esigin ashty. Ol kezde bul aýyl Orda (Bókeı ordasy) aýdanyna qaraıtyn. Aýylda eki orta mektep bolsa, sonyń bireýi Azǵyrda edi. Aldymen osynda bilim alǵan Muhtar Ájiǵulov joǵary synyptarda sol kezde aýdan ortalyǵy bolǵan Orda aýylyndaǵy irgesin 1841 jylǵy 6 jeltoqsanda Jáńgir han qalaǵan áıgili mektepte oqydy. 1941 jyly mektep bitirisimen osynda ustazdyq etti. Bir jyldan keıin ásker qataryna alynyp, maıdanǵa attandy. Saıqyn stansasyna deıin jaıaý-jalpylap jetse, sodan keıin taýarly vagonǵa mindi. Stalıngrad maıdanynda qııan-keski urystar júrip jatqan mezgil-di. Kóp uzamaı bular da sol qandy qasaptyń ortasyna tústi. 1942 jyldyń qarashasynan bastap keńes áskerleri men nemis fashısteri Stalıngrad maıdanynda bir-birimen qarsy keldi. 1943 jyldyń basynda Stalıngradty azat etý úshin bolǵan alapat soǵys bir aıǵa sozylyp, keńes áskerleriniń jeńisimen aıaqtaldy. Bularǵa dalada, qar ústinde jatýǵa týra keldi. Onyń ústine aýyr jaraqat alyp, emdeldi. Keıin áýeli Chkalov (Orynbor), sosyn Lenıngrad (Sankt-Peterbor) qalasynda radıotelegrafıster daıarlaıtyn kýrsta oqyp, Kalının jáne 2-Prıbaltıka maıdandarynda 6-gvardııalyq dıvızııada baılanysshy boldy. Osylaısha oq pen ottyń ortasynan ótken jaýynger Jeńis kúnin Kaýnas qalasynda qarsy aldy.
1945 jyly 15 qarashada serjant shenimen elge oralǵan Muhtar Ájiǵulov sol Orda aýylynda ustazdyq qyzmetin jalǵastyryp, joǵary synyptarǵa matematıkadan sabaq berdi. Astrahan pedagogıkalyq ınstıtýtynda, keıin Oral pedagogıkalyq ınstıtýtynda syrttaı bilim aldy. Kóp uzamaı Orda aýdandyq oqý bóliminiń meńgerýshisi boldy. Sosyn jıyrma jyldan astam ýaqyt boıy Qaratóbe jáne Jympıty (Syrym) aýdandarynda partııa, keńes organdarynda basshylyq qyzmetter atqardy. Qyryq jyldaı laýazymdy qyzmet atqarǵan maıdanger ekinshi dárejeli Otan soǵysy, Eńbek Qyzyl Tý, eki márte «Qurmet Belgisi», «Qurmet» ordenderimen, «Erligi úshin» jáne basqa medaldarmen marapattaldy. Búginde tórt birdeı ul-qyzynan taraǵan urpaqtarynyń ortasynda baqytty ǵumyr keshýde.
«Biz bárin de kórdik. Jastaıymyzdan qar jastanyp, muz jamyldyq. Soǵystan keıin qıraǵan sharýashylyqty qalpyna keltirýge atsalystyq. Búginde urpaq qyzyǵyn kórip otyrmyz. Eń bastysy, elimiz aman, jurtymyz tynysh bolyp, qaryshtap alǵa basa bersin. Elbasymyzdyń bastaýymen úshinshi jańǵyrýdy da sátti aıaqtap, Qazaqstan damyǵan otyz eldiń qataryna kirsin. Dúnıedegi jaqsylyq-ıgiliktiń bárin urpaqtarymyz kóre bersin. Memleket tarapynan kórsetilip otyrǵan qamqorlyq-qurmetke rızamyz, Uly Jeńis kúni qutty bolsyn», dedi «QazAqparat» tilshisine Muhtar Ájiǵulov.
