Jeńis kúni: 13 myńnan astam almatylyq tólem alady

ALMATY. QazAqparat – Almaty qalasy máslıhatynyń kezekten tys III sessııasynda Jeńistiń 78 jyldyǵyna oraı birjolǵy kómek kórsetý máselesin depýtattar biraýyzdan qoldady, dep habarlaıdy QazAqparat tilshisi.

Buǵan deıin Almaty qalasynyń ákimdigi árbir ardagerge 1 mıllıon teńge kóleminde qarajat berýdi qarastyrǵan bolatyn. Alaıda, megapolıs basshysy Erbolat Dosaevtyń usynysy boıynsha bıyl Almatydaǵy 58 soǵys ardageri 1,5 mıllıon teńge kóleminde aqshalaı tólem alatyn boldy.

Sondaı-aq, Almatynyń 13 233 turǵynyna merekege oraı 889,9 mln teńgege aqshalaı tólem qarastyrylyp otyr. Bul – Ekinshi dúnıejúzilik soǵysynyń qatysýshylary men múgedekterine teńestirilgen azamattar, eńbek maıdanynyń qatysýshylary, basqa memleketterdiń aýmaǵyndaǵy soǵys ardagerleri, soǵysta qaıtys bolǵan qatysýshylary men múgedekteriniń áıelderi, Aýǵanstanda jáne basqa memlekette qaza tapqandardyń otbasylary.

- UOS qatysýshylary men múgedekterine 1,5 mln teńgeden

- UOS qatysýshylaryna teńestirilgenderge 100 myń teńgeden

- Eńbek maıdanyna qatysýshylarǵa 50 myń teńgeden

- Basqa memleketter aýmaǵyndaǵy soǵys qımyldarynyń ardagerlerine 100 myń teńgeden

- UOS-da qaıtys bolǵan qatysýshylardyń, múgedekterdiń áıelderine 50 myń teńgeden

- Aýǵanstanda jáne basqa memleketterde qaza tapqandardyń otbasylaryna 100 myń teńgeden.

Óz kezeginde, depýtattar ardagerlerdi quttyqtaýǵa jáne olarǵa qosymsha kómek kórsetýge qatysatynyn jetkizdi.