Jeńis Qasymbek Jezqazǵan ákimine sógis jarııalady
JEZQAZǴAN. QazAqparat – Qaraǵandy oblysynyń ákimi Jeńis Qasymbek aýyzsýmen qamtý máselesindegi problemalar úshin Jezqazǵan qalasynyń ákimi Qaırat Begimovke sógis jarııalady, dep habarlaıdy QazAqparat aımaq ákimdigine silteme jasap.
Jeńis Qasymbek Jezqazǵanda bolyp, qala aktıviniń otyrysynda naqty josparlardy jarııalady. Máselen, kelesi jyly shahardyń bıýdjeti ulǵaıtylatyn bolady. Sońǵy eki jylda bul san eki esege ósken.
«Kelesi jyly qala bıýdjetin taǵy 5 mlrd teńgege ulǵaıtýdy josparlap otyrmyz. Bul qarajatty barynsha kóp áleýmettik máselelerdi sheshý úshin tıimdi paıdalanýǵa tıispiz», - dedi Jeńis Qasymbek.
Aımaq basshysy qalada halyq sany artyp kele jatqanyn atap ótti. Sondyqtan turǵyn úıge qajettilik týyndaıtyny anyq.
«Maǵan málim etkendeı, sońǵy jyldary qala turǵyndarynyń sany artqan. Bul – jaqsy jańalyq. Endi olar úshin úı salý kerek. Sol sebepti kelesi jyldan bastap Jezqazǵanda turǵyn úı qurylysyn eki esege ulǵaıtamyz. Tek áleýmettik úıler ǵana emes, ıpotekalyq, jalǵa beriletin jáne kommertsııalyq úıler salatyn bolamyz. 2018 jyly «Nurly jer» baǵdarlamasy boıynsha Jezqazǵanda eki kópqabatty úı salyndy. Bıylǵy jyly taǵy bir 18 páterli jańa úı turǵyzylady. Al 2020 jyly 60 páterli úı qoldanysqa tapsyrylady. Onyń qurylysyn bastadyq», - dedi ol.
Jezqagannyń kommýnaldyq máseleleri de nazardan tys qalǵan joq. Sońǵy kúnderi sýyq sýmen qamtamasyz etý máselesi syn týdyrdy. Aımaq basshysy Jezqazǵan qalasynyń ákimi Qaırat Begimovke sógis jarııalady.
«Men sýmen qamtamasyz etý máselelerimen aınalysatyn bólimsheniń jumysyna teris baǵa bergim kelip otyr. Sondaı-aq «Qazaqmystyń» basshylyǵyna osy máselege nazar aýdarýlaryńyzdy suraımyn – qalany sýmen jabdyqtaý mekemelerindegi basshylyq alyp otyrǵan laýazymdaryna qanshalyqty saı keletinin qarastyrý qajet», - dep tapsyrdy J.Qasymbek.
Oblys ákimi sondaı-aq qalanyń jylý berý maýsymyna daıyndyǵyn surady. Ol jergilikti JEO-da bolyp, jaǵdaımen tanysty. Jezqazǵandyqtardyń úıleri kelesi aptada jylý júıesine qosýǵa daıyn.
«Jylý berý maýsymyna qala daıyn. Úsh jylý trassalary jýyldy, qysymmen tekserildi jáne iske qosýǵa daıyn. 8 qazanda jylý berýdi josparlap otyrmyz. Sonymen qatar, biz jylý qubyrlaryn aýystyramyz, bul jumystar 2020 jyly aıaqtalady. Bul turǵyn úılerdi sapaly jylýmen qamtamasyz etýge múmkindik beredi», - dep túsindirdi Jezqazǵan qalasynyń ákimi Qaırat Begimov. Taǵy bir ózekti másele - Jezqazǵan-Qyzylorda trassasyn jóndeý. Óńir basshysy jobalyq-smetalyq qujattamany daıyndaý mamyr aıynda aıaqtalatynyn aıtty. Sondaı-aq, kelesi jyly qaıta qurý bastalady. Sonymen qatar, Qaraǵandy-Jezqaǵan joly da kúrdeli jóndeýdi qajet etedi. Bul jumystar 2021 jylǵa josparlanǵan. Bılik tek kólik qatynasy ǵana emes, áýe qatynasynda da máselelerdi sheshpek. Jergilikti turǵyndardan Jezqazǵan-Almaty avıareısin iske qosý týraly ótinish tústi. «Biz bul reısti kelesi jyly ashýdy josparlap otyrmyz. Barlyq qajetti máselelerdi tıisti mınıstrlikpen sheshkennen keıin», - dedi Jeńis Qasymbek. Oblys ákiminiń aıtýynsha, aqsaqaldar men qala turǵyndary aıtqan barlyq máseleler sheshilip jatyr. Biraq bul ýaqyt pen qarajatty qajet etedi. «Biz olardy sheshý úshin jumys isteıtin bolamyz», - dep qorytyndylady aımaq basshysy. Jezqazǵan óńirine jumys sapary barysynda ol mys balqytý zaýytynda da bolyp, kásiporynnyń josparymen jáne jumysymen tanysty.
