Jeńis Qasymbek: Jerleý qyzmetteriniń baǵasyn qymbattatý adamgershilikke jatpaıdy

QARAǴANDY. QazAqparat – «Jańaarqa aýdanynda koronavırýstan kúnine bes adamǵa deıin qaıtys bolady» degen aqparat shyndyqqa sáıkes kelmeıdi. Qaraǵandy oblysynyń ákimi Jeńis Qasymbek Saryarqa telearnasyndaǵy brıfıng barysynda osylaı málim etti, dep habarlaıdy QazAqparat tilshisi.

Ákimniń aıtýynsha maýsym aıynda aýdanda ár túrli sebeptermen 24 ólim jaǵdaıy tirkelgen.

Sondaı-aq, tikeleı efır barysynda oblys basshysyna jerleý qyzmeti baǵasynyń negizsiz ósýi týraly suraq qoıyldy. Áleýmettik jelide belgili bir agenttik Qaraǵandydan Qarqaralyǵa ólgen adamnyń máıitin jerleý úshin 500 myń teńge talap etkeni týraly jazba jarııalanǵan.

«Oblys ortalyǵynda jerleý qyzmetiniń quny - 150 myń teńge. Karantınge deıin de osyndaı baǵa boldy. Ótken aptada bul másele talqylandy. Qaraǵandyda «KVI« dıagnozymen jerleý qyzmetin tek «Patologoanatomııalyq ortalyq plıýs« JShS kórsetedi. Fırma basshylyǵy qala boıynsha baǵany 150 myń teńge, oblys boıynsha barlyq aýdandarǵa jetkizýdi qosa eseptegende 200 myń teńgege deıin qaldyrýǵa ýaǵdalastyq. Mysaly, Qarqaraly, Jáırem, Nura aýdany, Balqash.... Qarqaraly boıynsha negizsiz tólem faktisi rastalmady. Eger sizderde dálel bar bolsa, rastaıtyn qujattardy talap etińizder, biz árbir jaǵdaıdy anyqtaýǵa daıynbyz», - dedi Jeńis Qasymbek.

Ol sondaı-aq bul máseleni jeke baqylaýda ustaıtynyn aıtty. Onyń aıtýynsha, jerleý rásimderine qatysty qyzmetter kórsetýde alypsatarlyqqa barý adamgershilikke jatpaıdy.