Jeńis Qasymbek jańadan salynǵan joldardyń sapasy qalaı tekseriletinin túsindirdi
ASTANA. QazAqparat - QR Investıtsııalar jáne damý mınıstri Jeńis Qasymbek respýblıkalyq joldardyń sapasyna qatysty synǵa jaýap berdi, dep habarlaıdy QazAqparat.
«Búginde respýblıkalyq joldar jelisiniń sapasyn qadaǵalaý tetigi kóp satyly deńgeıde júrgiziledi. Bul turǵyda avtorlyq baqylaý bar, sodan keıin tehnıkalyq baqylaý jumystaryna mamandar jaldanady. Eger de jobany halyqaralyq bank qarjylandyrsa, onda kompanııalardy ózderi jaldaıdy. Negizinen, halyqaralyq tájirıbesi men mártebesi bar iri kompanııalar jaldanady. Olar táýelsiz. Mysaly, joldarda anyqtalǵan kez kelgen aqaýlar olardyń bedeline yqpal etedi. Sondyqtan bul kompanııalar osy jumystardy qatań baqylaýda iske asyrady», - dedi J. Qasymbek.
Sonymen qatar mınıstr halyqaralyq jáne jergilikti kelisimsharttar boıynsha 3-4 jyldyq kepildikti merzim bar ekenin atap ótti. Osy merzimge esep-shottarda banktik kepildik ustalynady.
«Eger de atalǵan kepildikti merzimde jolda aqaýlar anyqtalsa, onda kompanııa óziniń jeke qarjysyna tolyqtaı jóndeý jumystaryn atqarýy qajet. Bul turǵyda tapsyrys berýshige nysandy jańadan tapsyrady. Sonymen birge, qosymsha kepildikti merzimder uzartylady», - dep túsindirdi mınıstr.
Onyń sózine qaraǵanda, bul qadaǵalaý sharalary kompanııalardy bastapqydan sapaly jumystardy júrgizýge yntalandyrady.
«Bul baǵytta sot talqylaýlary men sapasyz qurylys nysandary sany aıtarlyqtaı azaıǵanyn aıta alamyn», - dedi J. Qasymbek.
Óz kezeginde Májilis depýtaty Nurtaı Sabılıanovtyń atap ótýinshe, salanyń basty problemasy - ol jol jabyndarynyń kóterý qabiletiniń jyldam tozýy.
«Máselen, kúrdeli ári ortasha jóndeýdi talap etetin jalpy paıdalanymdaǵy joldardyń uzaqtyǵy 30 myńnan astam shaqyrymdy quraıdy. Avtojoldardyń qaýipsizdigin arttyrý jáne jaı-kúıin jaqsartý úshin ýaqtyly jóndeý, sondaı-aq tıisinshe kútip-ustaý jumystaryn júrgizý qajet. Budan basqa, búgingi tańda avtojoldar jelisin kútip-ustaýǵa arnalǵan tehnıkanyń bolýy normatıvtik qajettilikten 3 esege az. Onyń ústine, olardyń 40 paıyzy fızıkalyq turǵydan tozǵan», - dedi depýtat.
Budan buryn habarlanǵandaı, Nurtaı Sabılıanov jol sapasyna teris áser etken negizgi sebepterdi atady. https://kaz.inform.kz/news/nurtay-sabil-yanov-zhol-sapasyna-teris-aser-etken-negizgi-sebepterdi-atady_a3386721
