Jeńis Qasymbek jańa joldardyń sapasyna qatysty pikir bildirdi
ASTANA. QazAqparat - Parlament Májilisiniń jalpy otyrysynda depýtat Aıqyn Qońyrov «QazAvtoJol» UK» AQ-nyń qyzmetine qatysty pikir bildirdi, dep habarlaıdy QazAqparat.
«Bul saýaldy Investıtsııalar jáne damý mınıstrligine qoıyp otyrmyn. Atap aıtqanda, «QazAvtoJol» UK» AQ-ǵa memlekettik múlikpen senimgerlik basqarý sharty boıynsha mindettemeni oryndaýǵa 50 mlrd teńgege tarta qarjyny aýdarýǵa nıetti bolyp otyrsyzdar. Sonymen birge kompanııanyń 2016 jyldaǵy qarjylyq jaǵdaıy týraly táýelsiz aýdıtorlyq esepke sáıkes, ulttyq kompanııanyń kepildendirilgen kiristeri 187 mlrd teńgege jýyq boldy. 2017 jyly «QazAvtoJol» sybaılas jemqorlyq daý-damaıyna belshesinen batqanyn kórip otyrmyz, osy rette para berý, qomaqty qarjyny jymqyrý jaǵdaılary oryn aldy. Sonymen qatar turǵyndar tarapynan nashar menedjment pen joldardyń sapasyna qatysty narazylyq baıqalýda. Bul turǵyda nege biz bıýdjetten 50 mlrd teńgeni bólemiz? Múmkin sharttyń talaptaryn qaıta qarastyrýdyń ýaqyty jetken shyǵar?», - dep surady depýtat Aıqyn Qońyrov.
Óz kezeginde Investıtsııalar jáne damý mınıstri Jeńis Qasymbek 50 mlrd teńge «QazAvtoJol» kompanııasynyń qajettilikterine emes, bul qarjy respýblıkalyq mańyzdaǵy joldardy qaıta salýǵa tartylǵan zaımdar boıynsha birlesip qarjylandyrýǵa baǵyttalatynyn jetkizdi. Halyqaralyq kelisimderge sáıkes, joba qunynyń 15 paıyzyn Qazaqstan respýblıkalyq bıýdjetten birlesip qarjylandyrýǵa mindetti. Al qalǵan 85 paıyzy zaımdar esebinen iske asyrylady.
Budan bólek, J. Qasymbek atalǵan kompanııa jobalar boıynsha tapsyrys berýshi bolyp tabylatynyn atap ótti.
«Joldardyń sapasyna toqtalsaq, sońǵy jyldary aıtarlyqtaı kemshilikter oryn alǵan joq. Osy orada jobalardy súıemeldeý boıynsha óte qatań normalardy engizdik. Sondyqtan búginde joldardaǵy jumystar aıtarlyqtaı joǵary deńgeıde júrip jatqanyn senimmen aıta alamyn»,-dep túıindedi sózin mınıstr.
