Jeńis Qasymbek Tótenshe jaǵdaı kezeńindegi Qaraǵandy oblysynyń tirshiligi qalaı bolatynyn aıtyp berdi
QARAǴANDY. QazAqparat – Búginnen bastap Qazaqstanda tótenshe jaǵdaı rejimi jumys isteıdi. Atalmysh shara koronavırýs COVID-19 taralýyn boldyrmaý úshin engizildi. Qaraǵandy oblysynyń ákimi Jeńis Qasymbek apparattyq keńeste aımaqtyń osy kezeńdegi tynys-tirshiligi týraly aıtyp berdi, dep habarlaıdy QazAqparat tilshisi
- TJ rejımi kezinde iri dúkender qysqartylǵan jumys rejımine kóshedi - olar 10.00-den 18.00-ge deıin ashyq bolady. Sýpermarketter, azyq-túlik dúkenderi men azyq-túlik bazarlary ózgerissiz jumys isteıtin bolady. Barlyq saýda obektilerinde sanıtarlyq qaýipsizdik sharalary kúsheıtiledi. Іri saýda jelileri men bazarlar ıeleriniń aıtýynsha, oblysta taýarlar men ónimderdiń tapshylyǵy joq.
- Kınoteatrlar, balalar oıyn alańdary, saýda ortalyqtaryndaǵy oıyn-saýyq aımaqtary, teatrlar, kórme pavılondary, túngi klýbtar men qorqor oryndary jabyq bolady.
-Sondaı-aq oblysta qoǵamdyq oryndarda, mekemelerde jáne qoǵamdyq kólikte sanıtarlyq-epıdemııaǵa qarsy is-sharalar júıeli túrde júrgiziledi.
- Dámhana men meıramhanalarǵa kelýshilerdiń sany men jumys ýaqyty shekteledi – endi mekemelerde 50-den astam adam bolmaýy tıis. Bul mekemeler 22.00-ge deıin ǵana qyzmet etedi.
- Kórermender jınalatyn oıyn-saýyq is-sharalaryna, sport jarystaryna tyıym salynady. Otbasylyq merekeler men estelik is-sharalarǵa da tyıym salynǵan.
- Mektepten tys qosymsha bilim berý mekemeleri ýaqytsha jabylady – úıirmeler, sektsııalar, aýla klýbtary ótkizilmeıdi.
- Balabaqshalar medıtsınalyq-sanıtarlyq baqylaýdy kúsheıte otyryp, jumysyn jalǵastyrady. Ata-analar ózderi balabaqshaǵa barýdy shekteı alady. Alaıda, memlekettik balabaqshadaǵy balalar úshin oryn saqtalatyn bolady.
- Statsıonarlar men qarttar úılerinde patsıentterge barýǵa ýaqytsha tyıym salynǵan. Balalar úıiniń tárbıelenýshilerine de barýǵa bolmaıdy.
- Naýryz meıramyna baılanysty kópshilik jınalatyn serýender bolmaıdy.
- Barlyq menshik túrindegi kásiporyndardyń ıelerine múmkindiginshe qyzmetkerlerdi qashyqtan jumys rejimine kóshirý usynylady.
- Kóliktiń kez kelgen túri úshin respýblıkadan tys jerlerge kirý jáne shyǵý shekteldi. QR Syrtqy ister mınıstrligi shaqyrǵan saparlardy qospaǵanda.
- Qaýipsizdikti, qoǵamdyq kóliktiń, kommýnaldyq qyzmetterdiń jumysyn qamtamasyz etetin strategııalyq obektilerdi kúzetý kúsheıtildi. Sondaı-aq medıtsınalyq tekserýden jaltarǵan, epıdemıologııalyq jaǵdaıdy anyqtaý úshin derekterdi jasyratyn, karantındik rejimdi buzǵan adamdardy baqylaýǵa alý kúsheıtiletin bolady.
