Jeńis Qasymbek Topardaǵy jarylystan soń barlyq jylý elektr stantsııalaryn qaıta tekserýdi tapsyrdy

QARAǴANDY. QazAqparat – Qaraǵandy oblysynyń ákimi Jeńis Qasymbek Topardaǵy MAES-2 oqıǵasynan keıin barlyq jylý jáne energııa kózderiniń jaı-kúıin qaıta tekserýdi tapsyrdy, dep habarlaıdy QazAqparat tilshisi.

«Energetıkalyq qadaǵalaý departamentine oblystaǵy barlyq jylý elektr stansalaryna qaıta tekserý júrgizýdi tapsyramyn», - dedi óńir basshysy onlaın rejımde ótken apparattyq keńeste.

Eske sala keteıik, 13 jeltoqsanda Abaı aýdanynda «Kazakhmys Energý» JShS Topar-2 MAES-de № 14 qazandyqtyń bý qubyry jarylǵan bolatyn. Tótenshe jaǵdaı saldarynan bir adam qaza taýyp, úsh adam kúıikpen aýrýhanaǵa jatqyzyldy.

Oqıǵa Abaı qalasy men Topar kentin jylýmen jáne elektrmen jabdyqtaýǵa áser etken joq. Stantsııada jóndeý-qalpyna keltirý jumystary júrgizilýde. Oqıǵanyń sebepterin tekserýmen jumys komıssııasy aınalysady, ol 10 kúndik merzimde qorytyndy berýi kerek.

Abaı aýdany ákimdiginiń aqparaty boıynsha, qazirgi ýaqytta zardap shekkenderdiń biri úı rejımine shyǵaryldy, ekeýi aýrýhanada emdelýdi jalǵastyrýda.

Jeńis Qasymbek Abaı aýdanynyń ákimine MAES basshylyǵymen birge qaza tapqan jáne zardap shekken qyzmetkerlerdiń otbasyna barlyq qajetti kómekti kórsetýdi tapsyrdy.