Jeńis Qasymbek: Temirtaýdaǵy zııandy shyǵaryndylardyń azaıǵanyn kórgimiz keledi
QARAǴANDY. QazAqparat - Qaraǵandy oblysynyń ákimi Jeńis Qasymbek «ArsellorMıttal Temirtaý» basshylyǵyn ekologııany jaqsartý jónindegi jospardyń oryndalýyn jedeldetýge shaqyrdy. Kásiporynnyń shyǵaryndylary qarqynyn tómendetý máselesi Temirtaýda ótken «jasyl keńeste» talqylandy, dep habarlaıdy QazAqparat tilshisi.
«EkoMurajaı» mamandary júrgizgen kartografııalyq zertteýler «ArsellorMıttal» Temirtaýdaǵy lastanýdyń basty kózi bolyp tabylatynyn rastaıdy. Sarapshylardyń qorytyndylary jerserigi arqyly jasalǵan túsirilimderge, aýany taldaýǵa jáne esepteýlerge negizdelgen. Metallýrgııalyq kombınat ornalasqan Shyǵys ónerkásip aımaǵy aýdanynda ekologtar aýadaǵy qara metallýrgııaǵa tán, shyǵaryndylardyń kózderinde alynǵan úlgilermen sáıkes keletin zattardy anyqtady.
Bul jaǵdaıdy túzetý úshin 2019 jyly Temirtaýda ekologııalyq jaǵdaıdy jaqsartý jónindegi jospar ázirlendi. Ol óndiristi jańǵyrtýdy, onyń tabıǵı gazǵa ishinara kóshýin, sondaı-aq qalany kógaldandyrýdy qamtıdy. Kásiporyn QR ekologııa, geologııa jáne tabıǵı resýrstar mınıstrligimen memorandýmǵa qol qoıdy. Qujatqa sáıkes, AMT atmosferaǵa zııandy zattardyń shyǵarylýyn 2024 jylǵa deıin 30%-ǵa azaıtýy tıis.
«Biz AMT-da ekologııany jaqsartý jónindegi nıetter bar ekenin kórip otyrmyz. Olar tıisti qujattarǵa, memorandýmǵa qol qoıdy. Biz atalmysh jobanyń iske asyrylýy qandaı satyda ekenin bilgimiz keledi. Jyl sońyna deıin ne bolatynyn, kelesi jyly ne kútý kerektigin bilý qajet. Jáne biz zııandy shyǵaryndylardyń naqty qanshalyqty azaıǵanyn kórgimiz keledi. Temirtaýdyń ekologııalyq jaǵdaıy osy kásiporynnyń jumysyna baılanysty», - dedi Jeńis Qasymbek.
Qazir «ArsellorMıttal» JEO-BAÚS jáne JEO-2 Qazandyq jabdyqtaryn qaıta jańǵyrtý jumystary júrgizilýde. Bul shyǵaryndylardy 36 myń tonnaǵa qysqartýǵa múmkindik beredi. Sonymen qatar gaz shyǵarý jolyn qaıta qurý jáne 500 myń aǵash otyrǵyzý josparlanýda.
«Bizdiń kompanııa ekologııa máselelerine erekshe kóńil bóledi. Biz barlyq múddeli taraptarmen turaqty negizde ózara is-qımyl jasaıtyn bolamyz. Qazir kóptegen jobalar engizý satysynda. Olardyń iske asyrylýymen ekologııalyq jaǵdaı aıtarlyqtaı jaqsarady. Biraq buǵan qol jetkizý úshin biz barlyǵymyz ortaq komanda retinde jumys isteýimiz kerek jáne árqaısysymyz óz jaýapkershiligimizdi túsinýimiz kerek», - dedi «ArselorMıttal Temirtaý» AQ Bas dırektory Bıdjý Naır.
Kezdesý sońynda óńir basshysy kásiporyn basshylyǵyn jumys qarqynyn jedeldetýge jáne ıdeıalarmen almasý úshin ekologtarmen yntymaqtasýǵa shaqyrdy.
