Jeńis Qasymbek Temirtaýdaǵy jylytý maýsymyna daıyndyq deńgeıin tekserip qaıtty

QARAǴANDY. QazAqparat - Qaraǵandy oblysynyń ákimi Jeńis Qasymbek Temirtaý qalasyna jumys sapary barysynda shahardyń aldaǵy jylytý maýsymyna daıyndyǵyn tekserip qaıtty. Oblys basshysyn sondaı-aq jańa áleýmettik nysandardyń qurylysyna qatysty máseleler de qyzyqtyrdy, dep habarlaıdy QazAqparat tilshisi.

Búgingi tańda Temirtaýda 1 163 kópqabatty úıdiń 947-i jylý berý maýsymyna tolyq daıyndyq aktisin aldy. Aldaǵy kúnderi taǵy 20 úı qujat alady.

Qysqa daıyndyq keste boıynsha júrip jatqandyǵyna kóz jetkizý úshin Jeńis Qasymbek Qaraǵandy GRES– 1-de bolyp qaıtty. Bıyl kásiporyn 600 mln teńgege aǵymdaǵy jóndeý jumystaryn júrgizdi. Bul aqshaǵa úsh qazandyq, eki týrboagregat, bý qubyry men qubyrlar, krandar men qosalqy konstrýktsııalar retke keltirildi. Óńir basshysy jóndeý jumystaryna jumsalǵan somany jetkiliksiz dep sanady. Ol elektr stansasynyń basshylaryna ınvestıtsııalyq saıasatty qaıta qaraýǵa keńes berdi. Sondaı-aq, jańa jabdyqtardy satyp alýǵa jáne qolda bar jabdyqtardy jóndeýge kómek kórsetý nusqalaryn oılastyrýǵa ýáde berdi.

Temirtaý JEO-2-de oblys ákimine jylý berý maýsymyna daıyndyq týraly baıandaldy. Munda № 5 jáne 6 qazandyqtarda kúrdeli jóndeý jumystary aıaqtalyp, №4 qazandyqtyń biteý armatýrasy men qyzý beti aýystyryldy, №3 týrbına retke keltirildi. Keıbir nysandarda jóndeý áli jalǵasýda. Bıyl kásiporynda jańa, jetinshi qazandyqty montajdaýǵa kirisedi. Ol úshin irgetas daıyn. Bul Temirtaýdaǵy jylý tapshylyǵynyń kóp jylǵy problemasyn sheshýge múmkindik beredi.

Óńir basshysy qalanyń jylý maýsymyna daıyndyǵyn jeke baqylaýda ustaýǵa ýáde berdi.

Jeńis Qasymbek sonymen qatar qala kásiporyndarynyń basshylarymen keńes ótkizdi. Onda jańǵyrtý, tarıfter, qyzmetkerlerdiń jalaqysyn arttyrý jáne basqa da máseleler talqylandy. «ArselorMıttal Temirtaý» kompanııasynyń bas dırektory Paramjıt Kalon metallýrgııalyq kombınatty gazǵa kóshirýdi usyndy. Onyń aıtýynsha, osylaısha óndiris arzan ári ekologııalyq bolady. Ol úshin Qazaqstan Úkimeti, «ArseloMıttal Temirtaý» jáne Eýropalyq Qaıta Qurý jáne damý banki arasynda shart jasasý qajet. Kásiporynnyń tolyq jumys isteýi úshin kúnine mıllıon tekshe metrge deıin gaz qajet bolady.

«Bul óte qyzyqty usynys. Siz suraǵan kólem óte úlken. Bizge naqty esepter qajet. Bul qaýipsizdik pen ekologııany jáne jańǵyrtýdy qozǵaıtyn mańyzdy máselelerdiń biri», - dep jaýap berdi Jeńis Qasymbek.

Óńir basshysy kásiporyn basshylaryna qyzmetkerlerdiń jalaqysyn kóterýdiń mańyzdylyǵy men medıtsınalyq saqtandyrý qoryna mindetti aýdarymdardyń qajettiligi týraly eske saldy.

Jumys sapary barysynda Jeńis Qasymbek sondaı-aq bolashaq dene shynyqtyrý-saýyqtyrý kesheni men jańa emhanada boldy. Bul nysandar Elbasynyń tapsyrmasy boıynsha «ArselorMıttal Temirtaý» qarjysy esebinen salynady.

Emhanany osy jyldyń qarasha aıynda tapsyrýǵa ýáde berdi. Munda 20 myń adamǵa qyzmet kórsetiletin bolady. Merdigerler jańa nysannyń qabyrǵalaryn kóterip, terezeler men esikterdi ornata bastady. Jaqyn arada olar ǵımarattyń syrtyn qaptaýǵa jáne ishki árleý jumystaryna kirisedi, kommýnıkatsııalar men aýmaqty abattandyrý bastalady.

320 oryndyq kórermender zaly bar dene shynyqtyrý –saýyqtyrý kesheni kelesi jyly ashylady. Qazir ol úshin irgetas tóselip, metall konstrýktsııalary qurastyrylýda.