Jeńis Qasymbek «Temirtaý» hokkeı klýbynyń taratylýy týraly aqparatqa túsinik berdi
Ortalyq kommýnıkatsııalar qyzmeti alańynda ótken baspasóz máslıhatynda oblys basshysyna: «Óńirde 3 hokkeı klýby («Temirtaý», «Saryarqa», «Qyran») bar. Olardyń bıýdjettik jaǵdaıy qalaı, bereshegi bar ma?», - degen saýal qoıyldy.
«Birinshiden, hokkeı klýbtarynyń oıynshylar aldynda eshqandaı qaryzy joq. Qarjy tek memlekettik kelisimniń aıasynda belgilengen lımıtpen bólinedi. Bul tártip barlyq ákimdik úshin birdeı. Men bul suraqtyń astaryn túsinip turmyn. Jelide «Temirtaý» hokkeı klýby bıyl óz qyzmetin toqtatýy múmkin degen aqparat tarady. «Temirtaý» hokkeı klýby óz qyzmetin odan ári jalǵastyratynyn resmı túrde málimdeımin. Hokkeı klýby temirtaýlyqtardyń súıikti komandasy. Sondyqtan komanda odan ári oınaı beredi», - dep jaýap berdi Jeńis Qasymbek.
Odan bólek, óńir basshysy hokkeı klýbtaryna qosymsha qarjy bólinbeıtinin málimdedi.
«Qarjy máselesi kez kelgen klýbta bar. Másele zań jáne bekitilgen kelisim aıasynda sheshiledi. Birden aıtyp óteıin, basqalaı, qosymsha qarjy bolmaıdy. Qolda bar qarjyǵa komanda jumysyn odan ári jalǵastyrýǵa ábden bolady», - deıdi ol.
Buǵan deıin J. Qasymbek «Qaraǵandy - Balqash» avtojolyn jóndeý kelesi jyly aıaqtalatynyn aıtqan edi.
Odan bólek, oblys ákimi «ArselorMıttal Temirtaýdaǵy» óndiris qaýipsizdigine qatysty pikir bildirdi.
