Jeńis Qasymbek Tarazdaǵy TJ týraly: Japa shekkenderge qajetti jaǵdaı jasalady
TARAZ. QazAqparat - Taraz qalasynda oryn alǵan jarylysty tergeý jónindegi úkimettik komıssııa oqıǵa ornyna keldi. Onda tekseris qorytyndysy boıynsha tótenshe jaǵdaılardy eskertý jáne joıý jónindegi operatıvti shtabtyń jumys keńesi ótkizildi, dep habarlaıdy primeminister.kz.
Gazdyń jarylý sebepterin anyqtaý maqsatynda sotqa deıin tergeý jumystary júrgizilip jatyr. Shuǵyl derekter boıynsha, zardap shegýshiler sany - 9 adam, onyń 3-eýi qaza tapqan. Jergilikti atqarýshy organdarmen birlesip zardap shegýshilerge kómek kórsetilip jatyr. Apat bolǵan úıdiń 100-den astam turǵyny ýaqytsha №47 mektepke kóshirildi. Buǵan qosa, zardap shegýshilerdiń bir bóligi «Báıterek» shaǵyn aýdanyndaǵy kópqabatty turǵyn úıge kóshirildi. Olarǵa ystyq tamaq berilip, ýaqytsha turýǵa qajetti jaǵdaılar jasalǵan, medıtsınalyq-psıhologııalyq kómek kórsetilip jatyr.
QR Premer-Mınıstriniń orynbasary Jeńis Qasymbek zardap shegýshi azamattarmen kezdesip, aldaǵy qoldaý sharalary týraly habarlady.
«Ázirge bul úı jabyq turady, onda tıisti zertteý jumystary júrgiziledi. Úıdiń qaıta qalpyna keltirýge jarap-jaramaıtynyn tekseremiz. Buǵan ýaqyt kerek. Jumystar júrgizilip jatqan kezde ákimdik sizderge ómir súrýge qajetti barlyq jaǵdaıdy jasaıdy», - dedi zardap shegýshilerge J. Qasymbek.
№47 orta mektepte QR Premer-Mınıstriniń orynbasary Jambyl oblysynyń ákimi Asqar Myrzahmetov, polıtsııa departamentteri, Ulttyq qaýipsizdik komıteti, «Jedel qutqarý jasaqtary» MM, «QazTransGazAımaq» JBF, «Taraz qalalyq elektr jelileri» JShS ókilderiniń qatysýymen operatıvti keńes ótkizdi.
Keńes qorytyndysy boıynsha Jambyl oblysynyń ákimine tıisti qyzmetterge apattyq-qalypqa keltirý jumystaryn júrgizýge kómek kórsetý, zardap shegýshilerge qalypqa keltirý jumystary kezeńinde ómir súrýge qajetti jaǵdaılar jasaý tapsyryldy.
Eske sala keteıik, Taraz qalasyndaǵy TJ baılanysty +7-7262-513575 nómiri boıynsha jedel jeli jumys isteıdi.
